பழுதான வகுப்பறைகள் இடிக்கப்பட்டதால் 10 மாதமாக கோவிலில் இயங்கி வரும் பள்ளி உடனடியாக புதிய கட்டிடம் கட்ட பொதுமக்கள் வலியுறுத்தல்

குடியாத்தம், 

வேலூர் மாவட்டம் குடியாத்தம் ஒன்றியம் மோடிகுப்பம் ஊராட்சி மத்தேட்டிபல்லி கிராமத்தில் ஊராட்சி ஒன்றிய நடுநிலைப்பள்ளி 75 ஆண்டுகளாக இயங்கி வருகிறது. ஆரம்ப காலத்தில் ஓலை வேய்ந்த கட்டிடத்தில் இயங்கி வந்த இந்த பள்ளிக்கு 1967–ம் ஆண்டு கட்டிடம் கட்டப்பட்டது. அந்த கட்டிடம் 50 ஆண்டுகளுக்கு மேல் ஆகிவிட்டதால் பராமரிப்பின்றி பழுதடைந்து விட்டது. எனவே புதிய வகுப்பறை கட்டிடம் கட்டித்தர வேண்டும் என அப்பகுதி மக்கள் கோரிக்கை விடுத்து வந்தனர்.

இதனையடுத்து 10 மாதங்களுக்கு முன்பு புதிய வகுப்பறை கட்டிடம் கட்டுவதற்கு ஏதுவாக பழுதடைந்த பழைய கட்டிடம் இடிக்கப்பட்டது. தற்போது அந்த பள்ளி வளாகத்தில் சத்துணவு மையம் மட்டுமே இயங்கி வருகிறது. பள்ளி கட்டிடம் இடிக்கப்பட்டதால் அருகில் உள்ள பாட்டசாரி கெங்கையம்மன் கோவிலில் தற்காலிகமாக பள்ளி இயங்கி வருகிறது.

புதிய கட்டிடம் விரைந்து கட்டி கொடுக்க வேண்டும் என அப்பகுதி மக்கள் பலமுறை கோரிக்கை விடுத்தும் இதுவரை கட்டிடம் கட்டி கொடுக்கப்படவில்லை. இதன் காரணமாக அருகில் உள்ள கோவிலிலேயே பள்ளி இயங்கி வருகிறது.

இது குறித்து கிராம மக்கள் கூறுகையில், ‘‘தனியார் பள்ளி மோகம் அதிகரித்துள்ள நிலையில் ஏழை மற்றும் நடுத்தர மக்கள் அரசு பள்ளிகளையே நம்பி உள்ளனர். தமிழக கல்வித்துறை அமைச்சர் மற்றும் கல்வித்துறை அதிகாரிகள் உடனடியாக தலையிட்டு விரைவில் பள்ளி கட்டிடம் கட்டித்தர நடவடிக்கை எடுக்க வேண்டும்’’ என்றனர்.

அதிகாரிகளிடம் கேட்டபோது இன்னும் சில தினங்களில் பள்ளிக்கு புதிய கட்டிடம் கட்டுவதற்கான நடவடிக்கைகள் தொடங்கப்பட உள்ளது என்றனர்.