கோவில் பிரசாதம் சாப்பிட்டு மரணம் அடைந்தவர்களுக்கு கர்நாடக சட்டசபையில் இரங்கல் முதோல் சம்பவத்தில் இறந்தவர்களின் குடும்பங்களுக்கு தலா ரூ.5 லட்சம் நிவாரணம் அறிவிப்பு

பெங்களூரு,

கர்நாடக சட்டசபையின் குளிர்கால கூட்டத்தொடர் கடந்த 10-ந் தேதி பெலகாவி சுவர்ண சவுதாவில் தொடங்கியது. முதல் நாள் கூட்டத்தில் முன்னாள் பிரதமர் வாஜ்பாய் உள்ளிட்ட தலைவர்களுக்கு இரங்கல் தெரிவித்து தீர்மானம் நிறைவேற்றப்பட்டது.

பின்னர் நாள் முழுவதும் சபை ஒத்திவைக்கப்பட்டது. அதையடுத்து இந்த கூட்டத்தொடர் 5 நாட்கள் நடைபெற்றன. சனி மற்றும் ஞாயிறு ஆகிய 2 நாட்கள் விடுமுறையை அடுத்து சட்டசபை நேற்று மீண்டும் பெலகாவி சுவர்ண சவுதாவில் கூடியது. இந்த கூட்டத்தொடரின் 6-வது நாள் கூட்டம் நேற்று காலை 11 மணிக்கு தொடங்கியது.

கூட்டம் தொடங்கியதும் கேள்வி நேரம் எடுத்துக்கொள்ளப்பட்டது. கூட்டம் தொடங்கியதும், துணை முதல்-மந்திரி பரமேஸ்வர் எழுந்து, சாம்ராஜ்நகர் மாவட்டம் சுலவாடி கிராமத்தில் வழங்கப்பட்ட கோவில் பிரசாதத்தை சாப்பிட்டவர்களில் மரணம் அடைந்தவர்களுக்கு இரங்கல் தெரிவித்து பேசினார்.

அவர் பேசுகையில், “கோவில் பிரசாதத்தில் விஷம் கலந்த விவகாரத்தில் இதுவரை 7 பேர் கைது செய்யப்பட்டுள்ளனர். தலைமறைவாக உள்ளவர்களை கைது செய்யும் பணிகள் தீவிரமாக நடந்து வருகின்றன. பிரசாதத்தில் உயிருக்கு கேடு விளைவிக்கும் ஏதோ ஒரு ரசாயனத்தை கலந்து இருப்பது சோதனை மூலம் தெரியவந்துள்ளது. இந்த சம்பவத்தில் மரணம் அடைந்தவர்களுக்கு இரங்கல் தெரிவித்துக் கொள்கிறேன். அதேபோல் பாகல்கோட்டை மாவட்டம் முதோல் தாலுகா குளலி என்ற பகுதியில் சர்க்கரை ஆலையில் கொதிகலன் வெடித்து சிதறியதில் 4 பேர் மரணம் அடைந்தனர். அவர்களின் மறைவுக்கும் இரங்கல் தெரிவித்துக் கொள்கிறேன்” என்றார்.

எதிர்க்கட்சி தலைவர் எடியூரப்பா பேசுகையில், “கோவில் பிரசாதம் சாப்பிட்டு மரணம் அடைந்தவர்கள் மற்றும் கொதிகலன் வெடித்ததில் இறந்தவர்களுக்கு ஆழ்ந்த இரங்கலை தெரிவித்துக் கொள்கிறேன். பிரசாதத்தில் விஷம் கலந்ததாக கூறப்படுபவர்களில் ஒருவரின் மகளே இந்த சம்பவத்தில் இறந்துள்ளார். இந்த சம்பவத்தில் தவறு செய்தவர்கள் மீது கடும் நடவடிக்கை எடுக்க வேண்டும்” என்றார்.


குமாரசாமி உத்தரவிட்டதை அடுத்து மைசூரு தனியார் மருத்துவமனைகள் எந்த கட்டணமும் பெறாமல் பாதிக்கப்பட்டவர்களுக்கு சிகிச்சை அளித்து வருகின்றன. இதுவரை 14 பேர் மரணம் அடைந்துள்ளனர்.

சமையல் செய்தவர்கள் கூட பாதிக்கப்பட்டு சிகிச்சை பெற்று வருகிறார்கள். இன்னும் 23 பேர் அபாயக் கட்டத்தில் சிகிச்சை பெற்று வருகிறார்கள். ஓம்சக்தி கோவிலுக்கு செல்ல முடிவு செய்திருந்த பக்தர்கள், இந்த கோவிலில் தரிசனம் செய்து பிரசாரம் சாப்பிட்டனர்.

இந்த சம்பவத்திற்கு அந்த கோவில் அறக்கட்டளை நிர்வாகிகள் தான் காரணம். அந்த நிர்வாக குழுவில் ஏற்பட்ட பிளவே இதற்கு முக்கிய காரணம் ஆகும். அதனால் அந்த அறக்கட்டளை நிர்வாக குழுவை கலைக்க வேண்டும். அந்த கோவிலை அரசே ஏற்று நடத்த வேண்டும். இவ்வாறு நரேந்திரா எம்.எல்.ஏ. பேசினார்.

எதிர்க்கட்சி துணைத்தலைவர் கோவிந்த் கார்ஜோள், “சுலவாடி கிராமத்தில் கோவில் பிரசாதம் சாப்பிட்டு மரணம் அடைந்தவர்கள் மற்றும் முதோல் சம்பவத்தில் இறந்தவர்களுக்கு இரங்கலை தெரிவித்துக் கொள்கிறேன்.

தனியார் பஸ் விபத்து மற்றும் பிரசாதம் சாப்பிட்டு மரணம் அடைந்தவர்களின் குடும்பங்களுக்கு அரசு சார்பில் நிவாரணமாக தலா ரூ.5 லட்சம் வழங்கப்பட்டுள்ளது. அதே போல் முதோல் கொதிகலன் வெடி விபத்தில் மரணம் அடைந்தவர்களின் குடும்பங்களுக்கும் அரசு தலா ரூ.5 லட்சம் நிவாரணம் வழங்க வேண்டும்” என்றார்.

அதைத்தொடர்ந்து மீண்டும் பேசிய பரமேஸ்வர், “முதோல் சம்பவத்தில் இறந்த 4 பேரின் குடும்பங்களுக்கு மாநில அரசு சார்பில் தலா ரூ.5 லட்சம் நிவாரணம் வழங்கப்படும்” என்றார்.