முதுமலை புலிகள் காப்பகத்தில், வனவிலங்குகள் கணக்கெடுக்கும் பணி மும்முரம் - 64 குழுவினர் பங்கேற்பு

மசினகுடி,

நீலகிரி மாவட்டத்தில் உள்ள முதுமலை புலிகள் காப்பகம் 688 சதுர கிலோ மீட்டர் பரப்பளவு கொண்டு உள்ளது. முதுமலை, கார்குடி, தெப்பக்காடு, மசினகுடி, நெலாக்கோட்டை, சிங்காரா, சீகூர், தெங்குமரஹாடா ஆகிய 8 வனச்சரகங்கள் கொண்ட இந்த புலிகள் காப்பகத்தில் 100-க்கும் மேற்பட்ட புலிகள் இருப்பதாக கூறப்படுகிறது. இந்த நிலையில் முதுமலை புலிகள் காப்பகத்தில் வனவிலங்குகளின் எண்ணிக்கை, அவற்றுக்கு தேவையான உணவு மற்றும் வனப்பகுதியின் தன்மை போன்றவைகள் குறித்து அறிந்து கொள்ள 6 மாதங்களுக்கு ஒரு முறை வனவிலங்குகள் கணக்கெடுப்பு நடத்தப்பட்டு வருகிறது.

இந்த நிலையில் இந்த ஆண்டிற்கான இறுதி கணக்கெடுப்பு பணி தற்போது தொடங்கி உள்ளது. இதற்காக கடந்த 17-ந்தேதி தெப்பக்காட்டில் உள்ள பயிற்சி அரங்கில் புலிகள் காப்பகத்தின் மையப்பகுதியில் கணக்கெடுப்பு பணியில் ஈடுபட்ட 29-குழுவினருக்கு பயிற்சி அளிக்கப்பட்டது.

அந்த குழுவினர் நேற்று அதிகாலை முதல் கணக்கெடுப்பு பணியில் ஈடுபட்டு வருகின்றனர். ஒவ்வொரு குழுவிலும் ஒரு வனத்துறை ஊழியர் மற்றும் 2 வேட்டைத்தடுப்பு காவலர் என 3 பேர் இடம் பெற்றுள்ளனர். தங்களுக்கு ஒதுக்கப்பட்ட வனப்பகுதியில் தங்கி உள்ள இந்த குழுவினர் காலை மற்றும் மாலை நேரங்களில் வனப்பகுதிக்குள் சென்று புலிகள், சிறுத்தைப்புலிகள், காட்டு யானைகள் உள்பட அனைத்து வனவிலங்குகளையும் கணக்கெடுத்து வருகின்றனர். நேரடியாக பார்த்தும், வனவிலங்குகளின் கால்தடம், எச்சம் போன்றவைகளை வைத்தும் தகவல்களை சேகரிக்கின்றனர். மேலும் நீர் நிலைகளுக்கு சென்று அங்கு வரும் வனவிலங்குகளையும் கணக்கெடுக்கின்றனர். இந்த பணி தற்போது மும்முரமாக நடைபெற்று வருகிறது.

இதனிடையே புலிகள் காப்பகத்தின் வெளிமண்டல பகுதிகளான சீகூர், சிங்காரா, தெங்குமரஹாடா வனப்பகுதிகளில் கணக்கெடுப்பு பணியில் ஈடுபட்டுள்ள வனத்துறையினருக்கு நேற்று தெப்பக்காட்டில் சிறப்பு பயிற்சி அளிக்கப்பட்டது.

வெளிமண்டல கள இயக்குனர் புஷ்பாகரன் தலைமையில் நடைபெற்ற பயிற்சி முகாமில் 100-க்கும் மேற்பட்ட ஊழியர்கள் கலந்து கொண்டனர். பயிற்சி அளிக்கப்பட்ட பின்னர் 35 குழுக்களாக பிரிக்கப்பட்டு சீகூர், சிங்காரா, தெங்குமரஹாடா பகுதிகளுக்கு சென்ற அந்த குழுவினர் வனச்சரகர்கள் மாரியப்பன், செல்வம், காந்தன் ஆகியோர் தலைமையில் இன்று காலை (புதன்கிழமை) முதல் கணக்கெடுப்பு பணியில் ஈடுபட உள்ளனர்.

முதுமலை புலிகள் காப்பகத்தில் மொத்தம் 64 குழுக்கள் கணக்கெடுப்பு பணியில் ஈடுபட்டு உள்ளன. அனைத்து குழுவினரும் 22-ந் தேதி மாலை வரை கணக்கெடுப்பு பணியில் ஈடுபடுகின்றனர். 23-ந்தேதி காலையில் தெப்பக்காட்டிற்கு திரும்பி வரும் 64 குழுவினரும் தாங்கள் சேகரித்த அனைத்து தகவல்களையும் வனத்துறை அதிகாரிகளிடம் வழங்குவார்கள்.