நாடாளுமன்ற தேர்தலில் அமோக வெற்றி பெறுவோம்: “எங்கள் கூட்டணிக்கு கமல்ஹாசன் வந்தால் வரவேற்போம்” காங்கிரஸ் மேலிட பார்வையாளர் சஞ்சய் தத் பேட்டி

நெல்லை, 

“நாடாளுமன்ற தேர்தலில் அமோக வெற்றி பெறுவோம். எங்கள் கூட்டணிக்கு கமல்ஹாசன் வந்தால் வரவேற்போம்” என்று காங்கிரஸ் மேலிட பார்வையாளர் சஞ்சய் தத் கூறினார்.

சஞ்சய் தத் பேட்டி

காங்கிரஸ் தேசிய செயலாளரும், தமிழக மேலிட பார்வையாளருமான சஞ்சய் தத் நேற்று நெல்லைக்கு வந்தார். அவர் கொக்கிரகுளத்தில் உள்ள காங்கிரஸ் கட்சி அலுவலகத்தில் நிருபர்களுக்கு பேட்டி அளித்தார். அப்போது அவர் கூறியதாவது:-

தமிழகத்தில் நாடாளுமன்ற தேர்தல் பணிகளை காங்கிரஸ் கட்சி தொடங்கி உள்ளது. தற்போது ராகுல்காந்தி உத்தரவுப்படி பூத் கமிட்டி நிர்வாகிகளை நியமிக்கும் பணிகள் தொடர்பாக சுற்றுப்பயணம் மேற்கொண்டு வருகிறேன்.

சமீபத்தில் நடந்து முடிந்துள்ள 5 மாநில சட்டசபை தேர்தல்களில் பா.ஜனதா கட்சி தோற்கடிக்கப்பட்டு உள்ளது. இந்த தேர்தல்களில் பா.ஜனதா பணத்தை தண்ணீராக செலவு செய்தது. அரசு எந்திரம், பண பலம் மற்றும் மின்னணு வாக்குப்பதிவு எந்திரத்தை முடக்கி வெற்றி பெற்று விடலாம் என்று கருதி தேர்தல் பணியில் ஈடுபட்டனர். ஆனால் அவர்களை மக்கள் புறக்கணித்து விட்டனர். இது மத்தியில் காங்கிரஸ் தலைமையில் ஆட்சி அமைவதற்கான முன்னோட்டம் ஆகும். காங்கிரஸ் கட்சி வெற்றி பெற்றால் ராகுல் காந்திதான் பிரதமர்.

கமலுக்கு வரவேற்பு

ராகுல் காந்தி பிரதமர் ஆவது குறித்து தி.மு.க. தலைவர் ஸ்டாலின் வெளியிட்ட அறிவிப்பை காங்கிரஸ் கட்சி வரவேற்கிறது. பா.ஜனதாவுக்கு எதிராக ராகுல் காந்தி மற்றும் ஸ்டாலின் ஆகியோர் இணைந்திருப்பது காங்கிரசுக்கு மிகப்பெரிய வெற்றியை பெற்றுத்தரும். தமிழகத்தில் தி.மு.க.-காங்கிரஸ் கூட்டணி நாடாளுமன்ற தேர்தலில் அனைத்து தொகுதிகளிலும் அமோக வெற்றி பெறும்.

மக்கள் நீதி மய்யம் கட்சி தலைவர் கமல்ஹாசன் எங்கள் கூட்டணிக்கு வந்தால் வரவேற்போம். கூட்டணிக்கு வருவது அவருடைய விருப்பம். பாசிச ஆட்சிக்கு எதிரான கொள்கைகளை உடைய கட்சிகள் காங்கிரஸ் கட்சியுடன் ஒன்று சேரும்.

கஜா புயல்

தமிழகத்தில் கஜா புயலால் பாதிக்கப்பட்ட பகுதியில் மாநில அரசு சரியாக செயல்படவில்லை. மக்களுக்கு சரியான நிவாரணம் கிடைக்கவில்லை. பிரதமர் மோடி கஜா புயலால் பாதிக்கப்பட்ட மக்களை சந்திக்க வரவில்லை. ஆனால் நடிகர், நடிகைகள் விழாக்களில் பங்கேற்று வருகிறார். ஸ்டாலின் கருத்து குறித்து தமிழிசை சவுந்தரராஜன் கூறியது பற்றி கண்டுகொள்ள தேவையில்லை. அவர் விளம்பரத்துக்காக இவ்வாறு பேசி வருகிறார்.

இவ்வாறு சஞ்சத் தத் கூறினார்.

ஆலோசனை கூட்டம்

பின்னர் அவர் நெல்லை மாவட்டத்தில் தேர்தல் பணியில் கட்சி சார்பில் பூத் கமிட்டி அமைத்திருப்பது தொடர்பாக வார்டு வாரியாக நிர்வாகிகளை சந்தித்து ஆலோசனை நடத்தினார்.

இந்த நிகழ்ச்சிகளில் முன்னாள் மத்திய மந்திரி ஆர்.தனுஷ்கோடி ஆதித்தன், வசந்தகுமார் எம்.எல்.ஏ., நெல்லை மாநகர் மாவட்ட காங்கிரஸ் தலைவர் சங்கரபாண்டியன், கிழக்கு மாவட்ட தலைவர் எஸ்.கே.எம்.சிவகுமார், முன்னாள் எம்.பி. ராமசுப்பு, முன்னாள் எம்.எல்.ஏ. சுடலையாண்டி உள்ளிட்டோர் கலந்து கொண்டனர்.