குடும்பத்தினர் யாரும் வராததால் ரவுடியின் உடலை பிரேத பரிசோதனை செய்வதில் தாமதம்

கடலூர், 

விழுப்புரம் மாவட்டம் ஆரோவில் அருகே உள்ள குயிலாப்பாளையத்தை சேர்ந்தவர் அமிர்தலிங்கம். இவருடைய மகன் ஏழுமலை என்கிற மைக்கேல் (வயது 36). ரவுடி. இவர் பிரபல ரவுடியான தாதா மணிகண்டனின் தம்பி ஆவார். கடந்த 15-ந்தேதி கொலை முயற்சி வழக்கில் ஏழுமலையை ஆரோவில் போலீசார் கைது செய்து, அன்று இரவு கடலூர் மத்திய சிறையில் அடைத்தனர். இந்த நிலையில் உடல் நலம் சரியில்லாமல் திடீரென அவர் உயிரிழந்து விட்டார். ஏழுமலையின் உடல் பிரேத பரிசோதனை செய்வதற்காக கடலூர் அரசு மருத்துவமனை எதிரே உள்ள பிணவறையில் வைத்தனர். இது பற்றி கடலூர் முதுநகர் போலீசார் வழக்குப்பதிவு செய்து விசாரித்து வருகின்றனர்.

இந்நிலையில் ஏழுமலை இறந்தது பற்றி அறிந்ததும் உறவினர்கள் யாரும் அவரது உடலை பார்க்க கடலூர் அரசு மருத்துவமனைக்கு வரவில்லை. நேற்று 3-வது நாள் மாலை வரையிலும் அவரது உறவினர்கள் யாரும் வரவில்லை. இதனால் ஏழுமலையின் உடலை பிரேதபரிசோதனை செய்து உறவினர்களிடம் ஒப்படைப்பதில் தாமதமும், சிக்கலும் தொடர்ந்து நீடித்து வருகிறது. இதற்கிடையே ஏழுமலையின் சாவில் சந்தேகம் இருப்பதாக கூறி அவரது மனைவி கோமதி சென்னை ஐகோர்ட்டில் மனு தாக்கல் செய்துள்ளார்.

இந்த மனு விசாரணைக்கு வந்து, தீர்ப்பு வந்த பிறகே ஏழுமலையின் உறவினர்கள் வந்து அவரது உடலை பிரேத பரிசோதனை செய்ய அனுமதிப்பார்கள் என்றும், அது வரை அவரது உடல் அரசு மருத்துவமனை பிணவறையில் பாதுகாப்பாக வைக்கப்படும் என்று போலீசார் தெரிவித்தனர். இருப்பினும் கடலூர் அரசு மருத்துவமனையில் பிரச்சினை ஏதும் நடக்காமல் தடுக்க தொடர்ந்து போலீசார் பாதுகாப்பு பணியில் ஈடுபட்டுள்ளனர்.