கிறிஸ்துமஸ் பண்டிகை கொண்டாட்டம்: கிறிஸ்தவ ஆலயங்களில் சிறப்பு பிரார்த்தனை

ஈரோடு, 

உலகம் முழுவதும் ஆண்டுதோறும் டிசம்பர் மாதம் 25-ந் தேதி கிறிஸ்துமஸ் பண்டிகை கொண்டாடப்பட்டு வருகிறது. அதன்படி இன்று (செவ்வாய்க்கிழமை) கிறிஸ்துமஸ் பண்டிகை கோலாகலமாக கொண்டாடப்படுகிறது. பண்டிகையையொட்டி கடந்த சில நாட்களுக்கு முன்பு இருந்தே கிறிஸ்தவ ஆலயங்கள் மின்விளக்குகளால் அலங்கரிக்கப்பட்டது. ஏசு கிறிஸ்து பிறப்புக்கான குடிலும் அமைக்கப்பட்டது. இதேபோல் கிறிஸ்தவர்கள் தங்களது வீடுகளுக்கு முன்பு நட்சத்திரங்களை தொங்க விட்டனர்.

இந்தநிலையில் நேற்று நள்ளிரவில் கிறிஸ்து பிறப்பையொட்டி பல்வேறு ஆலயங்களில் சிறப்பு பிரார்த்தனை நடந்தது. ஈரோடு புனித அமல அன்னை ஆலயத்தில் நேற்று இரவில் கிறிஸ்து பிறப்பு திருப்பலி நடந்தது. ஆலயத்தின் பங்குத்தந்தை ஜான் சேவியர் குழந்தை திருப்பலியை நிறைவேற்றினார். அதைத்தொடர்ந்து ஏசு கிறிஸ்துவின் பிறப்புக்கான நிகழ்வு நள்ளிரவு 12 மணிக்கு நடந்தது. இந்த நிகழ்வில் கூடியிருந்த கிறிஸ்தவர்கள் பார்ப்பதற்காக ஏசு கிறிஸ்துவின் உருவச்சிலை (சொரூபம்) உயர்த்தி காண்பிக்கப்பட்டு குடிலில் வைக்கப்பட்டது. ஆலயத்தில் அலங்கரிக்கப்பட்ட அழகிய குடிலை கிறிஸ்தவர்கள் ஏராளமானவர்கள் பார்த்துவிட்டு சென்றனர். கிறிஸ்தவர்கள் அனைவரும் தங்களுடைய குடும்பத்தினர், உறவினர்கள், நண்பர்களுக்கு வாழ்த்துகளை பகிர்ந்து மகிழ்ந்தனர்.

இதேபோல் ஈரோடு சி.எஸ்.ஐ. பிரப் நினைவு ஆலயத்தில் இன்று (செவ்வாய்க்கிழமை) அதிகாலை 5 மணிக்கு சிறப்பு ஆராதனை நடக்கிறது. தலைமை ஆயர் கே.சி.ரிச்சர்டு துரை, ஆயர் ஜேக்கப் லிவிங்ஸ்டன் ஆகியோர் தலைமையில் இந்த ஆராதனை நடக்கிறது. மேலும் ஈரோடு, பவானி, கவுந்தப்பாடி, கோபிசெட்டிபாளையம், சத்தியமங்கலம், நம்பியூர், கொடுமுடி, மொடக்குறிச்சி உள்பட அனைத்து கிறிஸ்தவ ஆலயங்களிலும் சிறப்பு ஆராதனை நடைபெறுகிறது.