உயர்மின் கோபுரங்கள் அமைக்க எதிர்ப்பு: சாட்டையால் அடித்து விவசாயிகள் நூதன ஆர்ப்பாட்டம்

திருவண்ணாமலை, 

உயர்மின் கோபுரங்கள் விவசாய நிலங்களில் அமைப்பதற்கு எதிர்ப்பு தெரிவித்து கடந்த 17–ந் தேதி முதல் திருவண்ணாமலை அருகே உள்ள தென்அரசம்பட்டு கிராமத்தில் விவசாய சங்கங்களின் கூட்டியக்கம் சார்பில் காத்திருப்பு போராட்டம் நடைபெற்று வருகிறது.

போராட்டத்தில் ஈடுபடும் விவசாயிகள் தூக்கு கயிற்றை கழுத்தில் போட்டு கொண்டும், வாயில் கருப்பு துணி கட்டியும், அரை நிர்வாணமாகவும் பல்வேறு வகையான போராட்டங்கள் மூலம் தங்கள் எதிர்ப்பை அரசுக்கு தெரிவித்து வருகின்றனர்.

காத்திருப்பு போராட்டத்தில் ஈடுபடும் விவசாயிகளில் 5 பேர் கடந்த 23–ந் தேதி முதல் காலவறையற்ற தொடர் உண்ணாவிரத போராட்டத்தில் ஈடுபட்டு வருகிறனர். இவர்களில் 2 பேர் கடந்த 23–ந் தேதி மயக்கம் அடைந்தனர். பின்னர் அவர்கள் திருவண்ணாமலை அரசு மருத்துவமனையில் சிகிச்சைக்காக சேர்க்கப்பட்டனர். அதைத்தொடர்ந்து நேற்று முன்தினம் இவர்கள் 2 பேருக்கு பதிலாக வேறு 2 பேர் உண்ணாவிரத போராட்டத்தில் ஈடுபட்டு உள்ளனர். நேற்று முன்தினம் காத்திருப்பு போராட்டத்தில் ஈடுபட்டு வரும் விவசாயிகள் தலைகீழாக நின்று ஆர்ப்பாட்டத்தில் ஈடுபட்டனர்.

இந்த நிலையில் நேற்று 11–ம் நாளாக காத்திருப்பு போராட்டம் தொடர்ந்து நடைபெற்றது. பகலில் ஆர்ப்பாட்டத்தில் ஈடுபட்டனர். அப்போது, ஒருவர் அவரது கழுத்தில் மத்திய, மாநில அரசு என்று எழுதப்பட்ட அட்டையை தொங்கவிட்டு இருந்தார். அவர் உண்ணாவிரதத்தில் ஈடுபட்டு வருபவர்கள் மீது சாட்டையால் அடிப்பது போன்றும், வாழை, நெல் போன்றவற்றின் மீது அடிப்பது போன்றும் செய்து காண்பித்து நூதன முறையில் போராட்டத்தில் ஈடுபட்டனர். தொடர்ந்து விவசாயிகள் காத்திருப்பு போராட்டத்திலும், உண்ணாவிரத போராட்டத்திலும் ஈடுபட்டு வருகின்றனர்.

இதனால் அந்த பகுதியில் பரபரப்பு ஏற்பட்டது.