பெண்ணால் மர்ம உறுப்பு வெட்டப்பட்ட வாலிபர் சிகிச்சை பலனின்றி சாவு

அம்பர்நாத்,

தானே டோம்பிவிலியை சேர்ந்தவர் துஷார்(வயது27). இவர் அதே பகுதியை சேர்ந்த 47 வயது பெண் ஒருவருக்கு பாலியல் தொல்லை கொடுத்து வந்துள்ளார். இதனால் ஆத்திரமடைந்த பெண் சம்பவத்தன்று துஷாரை டோம்பிவிலி, நந்திவிலி பகுதியில் உள்ள ஆள்நடமாட்டம் இல்லாத இடத்திற்கு வந்து தன்னை சந்திக்கும்படி கூறியுள்ளார். இதனையடுத்து துஷார் அங்கு சென்றுள்ளார். அப்போது அங்கு வைத்து அந்த பெண் தனது கூட்டாளிகள் தேஜாஸ்(25), பிரதிக்(22) ஆகியோருடன் சேர்ந்து துஷாரை சரமாரியாக தாக்கினார்.

பின்னர் அவர், கூட்டாளிகளை துஷாரின் கை, கால்களை பிடிக்க சொல்லிவிட்டு அவரது மர்ம உறுப்பை வெட்டினார்.

பின்னர் அவரே துஷாரை மீட்டு டோம்பிவிலி எய்ம்ஸ் ஆஸ்பத்திரியில் சிகிச்சைக்காக சேர்த்துவிட்டு சென்றுவிட்டார். இதைத்தொடர்ந்து ஆஸ்பத்திரியில் அவருக்கு தீவிர சிகிச்சை அளிக்கப்பட்டு வந்தது. இது குறித்த புகாரின்பேரில் போலீசார் வழக்குப்பதிவு செய்து, பெண் மற்றும் அவரது கூட்டாளிகள் 2 பேரையும் கைது செய்தனர்.

இந்தநிலையில் ஆஸ்பத்திரியில் சிகிச்சை பெற்றுவந்த துஷார் சிகிச்சை பலன் இன்றி பரிதாபமாக உயிரிழந்தார். இதையடுத்து போலீசார் பெண் உள்பட 3 பேர் மீதும் கொலை வழக்குப்பதிவு செய்து விசாரணை நடத்தி வருகின்றனர்.