தலைவாசல் அருகே குடும்ப தகராறில் குழந்தையை கொன்று தாய் தீக்குளிப்பு

தலைவாசல், 

சேலம் மாவட்டம் தலைவாசல் அருகே உள்ள கிழக்கு ராஜாபாளையம் கிராமத்தை சேர்ந்தவர் சிங்காரம். இவருடைய மகள் செல்வபிரியாவுக்கும்(வயது 23), திருச்சியை சேர்ந்த ஆட்டோ டிரைவரான சதீஷ் என்பவருக்கும் கடந்த 2 ஆண்டுகளுக்கு முன்பு திருமணம் நடந்தது. இவர்களுக்கு 1½ வயதில் ரோகிணி என்ற பெண் குழந்தை உள்ளது.

குடும்ப பிரச்சினை காரணமாக கணவன், மனைவி இடையே அடிக்கடி தகராறு ஏற்பட்டது. இதன் காரணமாக கடந்த 10 நாட்களுக்கு முன்பு செல்வபிரியா கணவருடன் கோபித்துக்கொண்டு தனது குழந்தையுடன் கிழக்கு ராஜாபாளையம் வந்தார். மேலும் மனவேதனையுடன் இருந்த செல்வபிரியா நேற்று வீட்டில் யாரும் இல்லாத போது தனது மீதும், குழந்தையின் மீதும் மண்எண்ணெயை ஊற்றி தீக்குளித்தார்.

இதையடுத்து வலியால் அலறி துடித்த அவருடைய சத்தத்தை கேட்டு அக்கம் பக்கத்தினர் அங்கு ஓடி வந்தனர். பின்னர் அவர்கள் தாய், குழந்தையின் மீது எரிந்த தீயை அணைத்து அவர்களை மீட்டு சிகிச்சைக்காக ஆத்தூர் அரசு ஆஸ்பத்திரியில் சேர்த்தனர். அங்கு சிகிச்சை பலனின்றி குழந்தை பரிதாபமாக இறந்தது.

ஆபத்தான நிலையில் செல்வபிரியாவுக்கு தொடர்ந்து சிகிச்சை அளிக்கப்பட்டு வருகிறது. இதுகுறித்து வீரகனூர் போலீசார் வழக்குப்பதிவு செய்து விசாரணை நடத்தி வருகின்றனர். குழந்தையை கொன்று தாய் தீக்குளித்த சம்பவம் அந்த பகுதியில் சோகத்தை ஏற்படுத்தியது.