சிதம்பரம் அருகே பரபரப்பு பூட்டிய வீட்டுக்குள் உடல் கருகி பிணமாக கிடந்த மாணவர்

சிதம்பரம், 

சிதம்பரம் அருகே உள்ள நாஞ்சலூர் பெரிய தெருவை சேர்ந்தவர் இளையராஜா(வயது 42). இவர் ஓசூரில் உள்ள தனியார் கம்பெனியில் எலக்ட்ரீஷியனாக வேலை பார்த்து வருகிறார். இவருடைய மகன் அரவிந்த்ராஜ்(18). இவர் சிதம்பரத்தில் உள்ள தனியார் பள்ளியில் 10-ம் வகுப்பு படித்து வந்தார். இந்த நிலையில் ஓசூரில் தான் புதிதாக வாங்கிய வீட்டை தனது மனைவியிடம் காண்பிப்பதற்காக அவரை கடந்த 24-ந்தேதி ஓசூருக்கு இளையராஜா அழைத்து சென்றார். அரவிந்த்ராஜ் 10-ம் வகுப்பு படித்து வந்ததால் அவர் மட்டும் நாஞ்சலூரிலே இருந்தார். அவரிடம் இளையராஜா அவ்வப்போது செல்போனில் பேசி நலம் விசாரித்துவந்தார்.

ஆனால் நேற்று முன்தினம் இரவு 8.30 மணிக்கு இளையராஜா அரவிந்த்ராஜின் செல்போனை தொடர்பு கொண்ட போது செல்போன் சுவிட்ச் ஆப் செய்யப்பட்டு இருந்தது. இதனால் அதிர்ச்சி அடைந்த இளையராஜா நேற்று நாஞ்சலூரை சேர்ந்த தனது நண்பர் ராமகிருஷ்ணனை செல்போனில் தொடர்புகொண்டு வீட்டில் போய் தனது மகனை பார்த்துவரும்படி கூறினார்.

அதன்பேரில் ராமகிருஷ்ணன் நாஞ்சலூரில் உள்ள இளையராஜாவின் வீட்டுக்கு சென்று பார்த்தார். அப்போது வீட்டின் கதவு உள்பக்கமாக பூட்டி இருந்தது. இதனால் வீட்டின் ஜன்னல் வழியாக எட்டிப் பார்த்தபோது உள்ளே உடல் கருகிய நிலையில் அரவிந்த்ராஜ் பிணமாக கிடந்தார்.

இதைக் கண்டு அதிர்ச்சி அடைந்த அவர், உடனடியாக இது குறித்த தகவலை இளையராஜாவுக்கு செல்போன் மூலம் ராமகிருஷ்ணன் தெரிவித்தார். இதையடுத்து அவர் தனது மனைவியுடன் கதறி அழுதபடி நாஞ்சலூருக்கு புறப்பட்டு வந்தார்.

இதுபற்றிய தகவல் அறிந்து சம்பவ இடத்துக்கு வந்த சிதம்பரம் தாலுகா போலீசார் வீட்டின் கதவை உடைத்து உள்ளே சென்று அரவிந்த்ராஜியின் உடலை கைப்பற்றி பிரேத பரிசோதனைக்காக சிதம்பரம் அரசு மருத்துவமனைக்கு அனுப்பி வைத்தனர். உடல் கருகிய நிலையில் பிணமாக இருந்த தங்கள் மகனின் உடலை பார்த்து இளையராஜாவும், அவரது குடும்பத்தினரும் கதறி அழுதது கல்நெஞ்சையும் கரைய வைப்பதாக இருந்தது.

இந்த நிலையில் தனது மகனின் சாவில் சந்தேகம் இருப்பதாக இளையராஜா போலீசில் புகார் செய்தார். அதன்பேரில் போலீசார் வழக்குப்பதிவு செய்து, அரவிந்த்ராஜை யாரேனும் கொலை செய்து எரித்து கொன்றனரா? அல்லது வேறு ஏதேனும் காரணமாக என்பது குறித்து விசாரித்து வருகின்றனர். மேலும் அரவிந்த்ராஜ் பயன்படுத்தி வந்த செல்போனில் பேசிய நபர்கள் யார், யார் என்பது குறித்து போலீசார் விசாரித்து வருகின்றனர். இந்த சம்பவம் அப்பகுதியில் பெரும் பரபரப்பை ஏற்படுத்தி இருக்கிறது.