குடியாத்தத்தில் வாலிபர் கொலை வழக்கில் 3 பேர் கைது

குடியாத்தம், 

குடியாத்தம் - காட்பாடி ரோடு ஆர்.எஸ்.நகர் பகுதியை சேர்ந்தவர் உலகநாதன் என்பவரது மகன் உதயசூரியன் (வயது 25). மேளம் அடிக்கும் தொழில் செய்து வந்தார். உதயசூரியன் 2 ஆண்டுகளுக்கு முன்பு உஷா (வயது 22) என்பவரை காதலித்து திருமணம் செய்து கொண்டார். உஷா தற்போது 5 மாத கர்ப்பிணியாக உள்ளார்.

நேற்றுமுன்தினம் மாலையில் உதயசூரியனும், அதே பகுதியை சேர்ந்த மகேந்திரன், சுமன் உள்ளிட்ட சிலரும் குடியாத்தம் காந்திநகர் பகுதியில் உள்ள டாஸ்மாக் கடைக்கு சென்று மது அருந்தி உள்ளனர். அப்போது அவர்களுக்கும், அந்த வழியாக சென்ற செதுக்கரை அண்ணாநகர் பகுதியை சேர்ந்த ராஜா, ரமேஷ் உள்ளிட்ட சிலருக்கும் வாக்குவாதம் ஏற்பட்டுள்ளது.

இதனைதொடர்ந்து ஏற்பட்ட தகராறில் மோட்டார்சைக்கிளில் சென்ற உதயசூரியனை சக்திநகர் அருகே ராஜா, ரமேஷ் உள்ளிட்டோர் கத்தியால் வெட்டி உள்ளனர். இதில் உதயசூரியன் வேலூர் அரசு மருத்துவமனைக்கு கொண்டு செல்லும் வழியில் இறந்தார்.

இந்த கொலை சம்பவம் தொடர்பாக குடியாத்தம் டவுன் போலீசார் வழக்குபதிவு செய்து விசாரணை நடத்திவந்தனர். மேலும் செதுக்கரை அண்ணாநகர் பகுதியை சேர்ந்த பெயிண்டர்கள் ராஜா (35), ரமேஷ் (28) ஆகியோரை கைது செய்தனர். மேலும் தகராறுக்கு காரணமான ஆர்.எஸ்.நகர் பகுதியை சேர்ந்த மகேந்திரன் (25) என்பவரையும் போலீசார் கைது செய்து விசாரணை நடத்தி வருகின்றனர்.