கொங்குநாடு மக்கள் தேசிய கட்சி தி.மு.க. கூட்டணியில்தான் உள்ளது பொதுச்செயலாளர் ஈ.ஆர்.ஈஸ்வரன் பேட்டி

நாமக்கல், 

கொங்குநாடு மக்கள் தேசிய கட்சியின் பொதுச்செயலாளர் ஈ.ஆர்.ஈஸ்வரன் நாமக்கல்லில் நிருபர்களுக்கு பேட்டி அளித்தார். அப்போது அவர் கூறியதாவது:- தமிழகத்தில் தேர்தல் என்பதே இனி நடக்காதா? என்கிற சந்தேகத்தை தேர்தல் ஆணையம் மீது மக்கள் வைக்கின்ற அளவில் நடவடிக்கைகள் நடந்து கொண்டிருக்கின்றன.

திருவாரூர் தேர்தலை அறிவித்துவிட்டு, புயல் நிவாரணங்கள் என கூறி, ரத்து செய்யப்பட்டு உள்ளது. தேர்தல் ஆணையம், தலைமை செயலாளரிடம் கேட்காமலா அறிவிக்கும். இதெல்லாம் மிகப்பெரிய சந்தேகத்தை ஏற்படுத்துகிறது. இனி எந்த தேர்தலை தேர்தல் ஆணையம் அறிவித்தாலும், அது நடக்குமா? என்ற சந்தேகம் மக்களிடையே வருவதை தவிர்க்க முடியாது.

தமிழகத்தில் 21 தொகுதிகள் சட்டமன்ற உறுப்பினர்கள் இல்லாமல் காலியாக உள்ளன. அதிலும் 18 தொகுதிகள் ஆண்டு கணக்கில் காலியாக இருக்கின்றன. எம்.எல்.ஏ.க்கள் மற்றும் உள்ளாட்சி பிரதிநிதிகள் இல்லாமல் வளர்ச்சி திட்டங்களை எப்படி நிறைவேற்ற முடியும். எனவே காலியாக உள்ள 21 தொகுதிகளுக்கும் ஒரே நேரத்தில் தேர்தல் நடத்துவதற்கு ஆணையம் முன்வர வேண்டும்.

உள்ளாட்சி தேர்தலையும் இதற்கு மேலும் தாமதபடுத்தாமல், உடனடியாக நடத்த முன்வர வேண்டும். தமிழக அரசு நிதி நெருக்கடியில் உள்ளது, அதே நேரத்தில் ரேஷன் கார்டுக்கு ஆயிரம் ரூபாய் என்பது தேவையான மக்களுக்கு, அது தேவையாகவும் இருக்கிறது. ஆயிரம் ரூபாயை வைத்து பொங்கலை சிறப்பாக கொண்டாட வாய்ப்பு உள்ளது. எந்தவிதமான இலவசமாக இருந்தாலும், தேவையானவர்களுக்கு செய்வதுதான் அவர்களுக்கு உதவியாக இருக்கும்.

அனைவருக்கும் ஆயிரம் ரூபாய் என சொல்வதில்தான் சந்தேகம் இருக்கிறது. எதை செய்தாலும் ஒரு தேர்தல் நோக்கம் இருக்கதான் செய்கிறது. நாடாளுமன்ற தேர்தல் வெகுசீக்கிரம் வரஇருக்கும் காரணத்தினால் இப்படிப்பட்ட முடிவுகளை எடுத்து இருக்கிறார்கள்.

தி.மு.க. கூட்டணியில்தான் கொங்குநாடு மக்கள் தேசிய கட்சி தொடந்து செயல்பட்டு கொண்டிருக்கிறது. இதற்கான கேள்விக்கு இடமே கிடையாது. தொகுதி சம்பந்தமான விஷயம் இதுவரை பேசப்படவில்லை. தேவை வரும்போது பேசப்படும். கள்ளக்குறிச்சி தனி மாவட்டமாக பிரிக்கப்பட்டதற்கு வரவேற்பை தெரிவித்து கொள்கிறேன். அதேபோல் பொள்ளாச்சி மற்றும் கோபிசெட்டிபாளையத்தையும் தனி மாவட்டமாக பிரிக்க வேண்டும். இவ்வாறு அவர் கூறினார்.

தொடர்ந்து கொங்குநாடு மக்கள் தேசிய கட்சியின் மாவட்ட செயற்குழு கூட்டத்தில் ஈ.ஆர்.ஈஸ்வரன் பேசினார். இந்த கூட்டத்தில் பேரவை தலைவர் தேவராசன், மாவட்ட செயலாளர் மாதேஸ்வரன், செயற்குழு உறுப்பினர்கள் சின்ராஜ், துரை, மாவட்ட பொருளாளர் மணி, துணை செயலாளர்கள் செல்வராஜ், குமரேசன் உள்ளிட்ட நிர்வாகிகள் கலந்து கொண்டனர்.