குடியரசு தினவிழாைவயொட்டி தமிழகம் உள்பட பல்வேறு இடங்களுக்கு 200 பஸ்கள் கூடுதலாக இயக்கம் கே.எஸ்.ஆர்.டி.சி. தகவல்

பெங்களூரு,

வருகிற 26-ந் தேதி குடியரசு தினவிழா கொண்டாடப்படுகிறது. பயணிகளின் வசதிக்காக கர்நாடக அரசு போக்குவரத்து கழகம் (கே.எஸ்.ஆர்.டி.சி.) சார்பில் 200 பஸ்கள் கூடுதலாக இயக்கப்படுகிறது. அதன்படி, நாளை (வெள்ளிக்கிழமை), நாளை மறுநாள் (சனிக்கிழமை) ஆகிய 2 நாட்கள் பெங்களூருவில் இருந்து கர்நாடகம் முழுவதும், வெளிமாநிலங்களுக்கும் கூடுதல் பஸ்கள் செல்லும். வருகிற 27-ந் தேதி பிற மாநிலங்களில் இருந்தும், கர்நாடகத்தின் பிற பகுதிகளில் இருந்தும் பெங்களூருவுக்கு கூடுதல் பஸ்கள் இயங்கும்.

சாந்திநகர் பஸ் நிலையத்தில் இருந்து தமிழகத்தின் மதுரை, கும்பகோணம், திருச்சி, சென்னை, கோயம்புத்தூர் மற்றும் திருப்பதி, விஜயவாடா, ஐதராபாத் மற்றும் தமிழகம், ஆந்திரா, தெலுங்கானா உள்ளிட்ட பிற இடங்களுக்கு பஸ்கள் செல்லும். பெங்களூரு கெம்பேகவுடா பஸ் நிலையத்தில் இருந்து தட்சிண கன்னடா, சிவமொக்கா, ஹாசன், தாவணகெரே மற்றும் வடகர்நாடக மாவட்டங்களுக்கும், திருப்பதிக்கும் பஸ்கள் செல்லும்.

மைசூரு ரோடு பஸ் நிலையத்தில் இருந்து மைசூரு, குடகு மாவட்டங்களின் வெவ்வேறு இடங்களுக்கும் பஸ்கள் செல்லும். இதுதவிர, விஜயநகர், ஜெயநகர் 4-வது பிளாக், ஜாலஹள்ளி கிராஸ், நவ்ரங் (ராஜாஜிநகர்), மல்லேசுவரம் 18-வது கிராஸ், பனசங்கரி, ஜீவன்பீமாநகர், ஐ.டி.ஐ. கேட், கங்காநகர், கெங்கேரி சேட்டிலைட் டவுன் ஆகிய இடங்களில் இருந்து சிவமொக்கா, தாவணகெரே, திருப்பதி, மங்களூரு, குந்தாபுரா, சிருங்கேரி, ஒரநாடு, குக்கேசுப்பிரமணியா, தர்மஸ்தலா உள்ளிட்ட பல இடங்களுக்கு பஸ்கள் செல்லும்.

பயணிகள் முன்பதிவு மையங்கள் மூலமாக டிக்கெட் முன்பதிவு செய்து கொள்ளலாம்.www.ksrtc.in இணையதளம் வழியாகவும் டிக்கெட் முன்பதிவு செய்யலாம்.

வெளியூருக்கு செல்வது, திரும்புவதற்கு சேர்த்து முன்பதிவு செய்தால் டிக்கெட் கட்டணத்தில் இருந்து 10 சதவீதமும், 4 அல்லது அதற்கு மேற்பட்ட பயணிகள் ஒரே டிக்கெட்டில் பயணித்தால் டிக்கெட் கட்டணத்தில் இருந்து 5 சதவீதமும் சலுகையாக வழங்கப்படும்.

மேற்கண்ட தகவல் கே.எஸ்.ஆர்.டி.சி. வெளியிட்ட செய்திக்குறிப்பில் கூறப்பட்டுள்ளது.