ஆஞ்சநேயருக்கு மாலை அணிவித்தபோது தவறி விழுந்த அர்ச்சகர் சாவு

நாமக்கல்,

நாமக்கல் கோட்டை சாலையை சேர்ந்தவர் வெங்கடேசன்(வயது 53). அர்ச்சகரான இவர் தனியார் நிறுவனம் ஒன்றில் உதவி பொது மேலாளராகவும் பணிபுரிந்து வந்தார். விடுமுறை நாட்களில் நாமக்கல் ஆஞ்சநேயருக்கு பணிவிடை செய்ய வருவார். அந்த வகையில் குடியரசு தினத்தன்று வெங்கடேசன் ஆஞ்சநேயருக்கு பணிவிடை செய்ய வந்தார்.

18 அடி உயரம் கொண்ட ஆஞ்சநேயருக்கு அவர் சுமார் 8 அடி உயரத்தில் பலகையில் நின்றப்படி மலர்மாலை அணிவித்து கொண்டு இருந்தார். பின்னர் அந்த பலகையில் பின்னோக்கி வந்த வெங்கடேசன் எதிர்பாராதவிதமாக பலகையில் இருந்து கீழே தவறி விழுந்தார். இதில் படுகாயம் அடைந்த அவரை உடனடியாக சேலத்தில் உள்ள தனியார் ஆஸ்பத்திரியில் சேர்த்தனர். அங்கு அவருக்கு தீவிர சிகிச்சை அளிக்கப்பட்டு வந்தது.

இந்த நிலையில், வெங்கடேசனின் உடல்நிலை கவலைக்கிடமாக ஆனதால் மேல்சிகிச்சைக்காக அவரை நாமக்கல் அரசு ஆஸ்பத்திரிக்கு நேற்று முன்தினம் இரவு கொண்டு வந்தனர். ஆனால் சிகிச்சை பலனின்றி வெங்கடேசன் நள்ளிரவு பரிதாபமாக இறந்தார்.

இது குறித்து நாமக்கல் போலீசார் வழக்குப்பதிவு செய்து விசாரணை நடத்தி வருகின்றனர். இறந்துபோன வெங்கடேசனுக்கு ஜெயலட்சுமி என்ற மனைவியும், அரவிந்த் (25) என்ற மகனும் உள்ளனர். அரவிந்த் சென்னையில் உள்ள தனியார் நிறுவனம் ஒன்றில் வேலை பார்த்து வருகிறார்.

இந்த நிலையில் கோவில் கருவறைக்குள் வெங்கடேசன் தவறி விழுந்ததால், நேற்று முன்தினம் ஆஞ்சநேயர் சன்னதி முழுவதும் தூய்மை செய்யப்பட்டு, அர்ச்சகர்கள் மூலம் கலசங்கள் வைத்து பரிகார பூஜை செய்யப்பட்டது குறிப்பிடத்தக்கது.

இதற்கிடையே வெங்கடேசன் நாமக்கல் ஆஞ்சநேயர் மாலை அணிவிக்கும்போது தவறி விழும் காட்சி ‘வாட்ஸ்-அப்பில்’ வைரலாக பரவி வருகிறது.