கீரனூர், 

புதுக்கோட்டை மாவட்டம், கீரனூர் அருகே உள்ள ஒத்தக்கடை மேலப்புதுவயலை சேர்ந்தவர் விஜயபாஸ்கர் (வயது 45). அ.தி.மு.க. பிரமுகரான இவர், அமைச்சர் விஜயபாஸ்கரின் தீவிர ஆதரவாளர். இவர் வடக்கு ரதவீதியில் காய்கறிகள், பழங்கள் வியாபாரம் செய்து வந்தார்.

இந்நிலையில் வியாபாரத்திற்கு வாங்குவதற்காக வழக்கம் போல் நேற்று அதிகாலை திருச்சி காய்கறி மார்க்கெட்டுக்கு சென்று காய்கறி, பழங்களை வாங்கினார். பின்னர் வாங்கிய காய்கறி, பழங்களை கடையில் வைத்து விட்டு வீட்டிற்கு சென்றார். பின்னர் அதனை எடுக்க விஜயபாஸ்கர் நீண்ட நேரமாகியும் கடைக்கு வரவில்லை.

இதையடுத்து கடைக்காரர்கள் விஜயபாஸ்கர் செல்போனுக்கு தொடர்பு கொண்டும், அவர் எடுக்கவில்லை. இதையடுத்து சந்தேகமடைந்து கடையில் வேலை பார்ப்பவர்கள், அவரது வீட்டிற்கு சென்று பார்த்தபோது வீட்டில் தூக்கில் தொங்கிய நிலையில் விஜயபாஸ்கர் பிணமாக கிடந்தார்.

இதுகுறித்து கீரனூர் போலீசாருக்கு தகவல் கொடுக்கப்பட்டது. அதன்பேரில் போலீசார் சம்பவ இடத்திற்கு விரைந்து வந்து விஜயபாஸ்கர் உடலை கைப்பற்றி பிரேத பரிசோதனைக்காக புதுக்கோட்டை அரசு மருத்துவமனைக்கு அனுப்பி வைத்தனர். மேலும் இது தொடர்பாக வழக்குப்பதிவு செய்து, விஜயபாஸ்கர் தற்கொலை செய்து கொண்டாரா? அல்லது வேறு ஏதேனும் காரணமா? என போலீசார் விசாரணை நடத்தி வருகின்றனர். விஜயபாஸ்கருக்கு, மகாலட்சுமி என்ற மனைவியும், 2 மகள்கள், 1 மகன் உள்ளது குறிப்பிடத்தக்கது.