ஒகேனக்கல் அருகே காட்டு யானை மிதித்து முதியவர் பலி தேன்எடுக்க சென்றபோது பரிதாபம்

பென்னாகரம்,

இதுபற்றிய விவரம் வருமாறு:–

தர்மபுரி மாவட்டம் பென்னாகரம் அருகே உள்ள மடம் பண்ணப்பட்டி பகுதியை சேர்ந்தவர் ஜடையன் (வயது 75). இவர் நேற்று மதியம் 12 மணியளவில் ஒகேனக்கல் வனப்பகுதியில் உள்ள ஓரச்சிபள்ளம் என்ற இடத்திற்கு தேன் எடுக்க சென்றார்.

அப்போது ஒரு மரத்தின் அருகில் நின்று கொண்டு தேன் எடுக்க முயன்றார். திடீரென அங்கு ஒரு காட்டு யானை வந்தது. இதை கண்டு அதிர்ச்சி அடைந்த ஜடையன் அங்கிருந்து தப்பி ஓட முயன்றார்.

ஆனால் அந்த காட்டு யானை, ஜடையனை துரத்தி வந்து மிதித்தது. இதில் அவர் சம்பவ இடத்திலேயே உடல்நசுங்கி பரிதாபமாக இறந்தார். இதை அறிந்ததும் வனத்துறையினர் அங்கு சென்று பார்த்தனர். பின்னர் இதுகுறித்த தகவலின் பேரில் கிராம நிர்வாக அலுவலர் முருகேசன் ஒகேனக்கல் போலீசில் புகார் செய்தார்.

போலீசார் சம்பவ இடத்துக்கு சென்று பார்வையிட்டு விசாரணை நடத்தினார்கள். இதையடுத்து போலீசார் ஜடையன் உடலை கைப்பற்றி பிரேத பரிசோதனைக்காக பென்னாகரம் அரசு மருத்துவமனைக்கு அனுப்பி வைத்தனர்.

பலியான ஜடையனுக்கு மாதம்மாள் என்ற மனைவியும், 4 மகள்களும், 3 மகன்களும் உள்ளனர்.