பெண்ணாடம் அருகே மொபட் மீது டிராக்டர் மோதி எலக்ட்ரீசியன் பலி

பெண்ணாடம், 

பெண்ணாடம் அருகே உள்ள மேல்இருளம்பட்டு கிராமத்தை சேர்ந்தவர் ராமச்சந்திரன். இவரது மகன் திருமுருகன்(வயது 24). தொழிற் பயிற்சி பட்டய படிப்பு முடித்துள்ள இவர், வெளிநாட்டில் வேலை பார்த்து வந்தார். இந்த நிலையில் கடந்த 2 ஆண்டுகளுக்கு முன்பு சொந்த ஊருக்கு வந்த திருமுருகன், தற்போது எலக்ட்ரீசியனாக வேலை பார்த்து வந்தார்.

இந்த நிலையில் அடுத்த வாரம் வெளிநாடு செல்வதற்கு திருமுருகன் திட்டமிட்டிருந்தார். நேற்று தனது சொந்த வேலை காரணமாக, மொபட்டில் பெண்ணாடத்தில் இருந்து விருத்தாசலம் நோக்கி சென்று கொண்டிருந்தார்.

அப்போது பெண்ணாடம் அருகே உள்ள வால் பட்டறை என்ற இடத்தில் சென்ற போது, அவருக்கு பின்னால் வந்த டிராக்டர் எதிர்பாராதவிதமாக மொபட் மீது மோதியது. இதில் பலத்த காயமடைந்த திருமுருகனை அந்த பகுதியை சேர்ந்தவர்கள் மீட்டு, சிகிச்சைக்காக திட்டக்குடி அரசு மருத்துவமனைக்கு அனுப்பி வைத்தனர். அங்கு அவருக்கு டாக்டர்கள் உரிய சிகிச்சை அளித்தும், சிகிச்சை பலனளிக்காமல் திருமுருகன் பரிதாபமாக உயிரிழந்தார்.

இதுபற்றி அறிந்த அவரது பெற்றோர் மற்றும் உறவினர்கள் மருத்துவமனைக்கு விரைந்து வந்தனர். அங்கு பிணமாக கிடந்த திருமுருகனின் உடலை பார்த்து அவர்கள் கதறி அழுதனர். இதனால் மருத்துவமனை வளாகமே சோகத்தில் காணப்பட்டது. விபத்து குறித்து அவரது தந்தை ராமச்சந்திரன் அளித்த புகாரின் பேரில் பெண்ணாடம் போலீசார் வழக்குப்பதிவு செய்த விசாரித்து வருகின்றனர்.