திருப்பத்தூர் அருகே அரியவகை மானை வேட்டையாடிய விவசாயி கைது 3 பேருக்கு வலைவீச்சு

திருப்பத்தூர், 

திருப்பத்தூர் அருகே உள்ள ஜவ்வாதுமலை காட்டு பகுதியில் இருந்து புள்ளிமான்கள் மற்றும் அரிய வகையை சேர்ந்த கேளை மான்கள் தண்ணீர் தேடி விவசாய நிலங்களுக்கு வருகின்றன. அவற்றை சிலர் வேட்டையாடுகின்றனர். அதேபோல், ஜவ்வாதுமலை மாம்பாக்கம் காப்புக்காடு பகுதியில் சுற்றித்திரிந்த அரியவகை கேளைமானை மர்ம நபர்கள் பிடித்து, அதன் கறியை கூறுபோடுவதாக திருப்பத்தூர் வனத்துறையினருக்கு ரகசிய தகவல் கிடைத்தது.

அதன்பேரில் வனச்சரக அலுவலர் கே.ஆர்.சோழராஜன் தலைமையில், வனவர்கள் ஏ.சஞ்சீவி, ஏ.பரந்தாமன், வனக்காப்பாளர்கள் ஏ.வெங்கடேசன், எஸ்.சதீஷ்குமார், ஏ.இளையராஜா, ஆர்.அசோகன் ஆகியோர் சம்பவ இடத்திற்கு விரைந்து சென்றனர். அப்போது, திருப்பதிசாமி கோவில் வழி சரகத்தில் இருந்து 4 பேர் நடந்து வந்து கொண்டிருந்தனர். அவர்கள், வனத்துறையினரை கண்டதும் நாலாபுறமாக சிதறி ஓடினர். அதில் ஒருவரை மட்டும் வனத்துறையினர் சுற்றிவளைத்து பிடித்தனர். மற்ற 3 பேர் தப்பி ஓடிவிட்டனர்.

பின்னர் வனத்துறையினர் பிடிப்பட்டவரிடம் விசாரணை நடத்தியதில் அவர், திருப்பத்தூர் அருகே உள்ள புதூர்பூங்குளத்தை சேர்ந்த விவசாயி வெங்கடேசன் (வயது 40) என்பதும், கேளைமானை பிடித்து வெட்டி கூறுபோட்டதும் தெரியவந்தது.

அதைத் தொடர்ந்து வெங்கடேசனிடம் இருந்து மானின் தோல், வலைகள், அரிவாள், கத்தி போன்ற ஆயுதங்களை பறிமுதல் செய்தனர். மேலும் வெங்கடேசனை கைது செய்து, சிறையில் அடைத்தனர். தப்பி ஓடிய 3 பேரை வலைவீசி தேடி வருகின்றனர்.