தனியார் வங்கி முன்னாள் தலைவர் சந்தா கோச்சார், கணவரிடம் அமலாக்கத்துறை விசாரணை

மும்பை,

ஐ.சி.ஐ.சி.ஐ. வங்கியின் முன்னாள் தலைவர் சந்தா கோச்சார். இவர் பதவியில் இருந்த போது, வீடியோகான் குழும நிறுவனத்துக்கு ரூ.1,875 கோடி முறைகேடாக கடன் வழங்கியதாகவும், இதற்கு கைமாறாக சந்தா கோச்சாரின் கணவர் தீபக் கோச்சாரின் நிறுவனத்தில் வீடியோகான் நிர்வாகி வேணுகோபால் தூத் முதலீடு செய்ததாகவும்கூறப்படுகிறது. 

இதுதொடர்பாக சந்தா கோச்சார், அவரது கணவர் தீபக் கோச்சார், வேணுகோபால் தூத் உள்ளிட்டவர்கள் மீதுசி.பி.ஐ. வழக்குப்பதிவு செய்தது. அவர்கள் மீது அமலாக்கத்துறையும் பணமோசடி தடுப்பு சட்டத்தின் கீழ் வழக்குப்பதிவு செய்தது. 

இந்த நிலையில் அமலாக்கத்துறையினர் நேற்று முன்தினம் மும்பையில் சந்தா கோச்சார், வேணுகோபால் தூத் ஆகியோரின் வீடு, அலுவலகங்களில் அதிரடி சோதனை நடத்தினர். அப்போது முக்கிய ஆவணங்களை கைப்பற்றியதாக கூறப்பட்டது.

இந்த நிலையில் நேரில் ஆஜராகி விளக்கம் அளிக்கும்படி சந்தா கோச்சார் மற்றும் அவரது கணவர் தீபக் கோச்சார் ஆகியோருக்கு சம்மன் அனுப்பினர். அதன்படி நேற்று அவர்கள் மும்பையில் உள்ள அமலாக்கத்துறை அலுவலகத்தில் அதிகாரிகள் முன்பு ஆஜரானார்கள். அப்போது வழக்கு சம்பந்தமாக பல்வேறு கேள்விகளை கேட்டு அதிகாரிகள் விசாரணை நடத்தினர். மேலும் பண மோசடி தடுப்பு சட்டத்தின் கீழ் கணவர்-மனைவி இருவரிடமும் அதிகாரிகள் வாக்குமூலத்தை பதிவு செய்துகொண்டதாக தெரிகிறது.