இந்தியாவின் இறையாண்மையை பாதுகாக்க முப்படைகளும் பயன்படுத்தப்படும் - கோவை விமானப்படை விழாவில் ஜனாதிபதி பேச்சு

பார்வையாளர்களை பரவசப்படுத்திய விமான சாகச நிகழ்ச்சிகள்

சூலூர் விமானப்படை தளத்தில் சிறந்த சேவைக்கான விருது வழங்கும் நிகழ்ச்சி நடந்தது. இதையொட்டி விமானப்படை விமானங்கள் மற்றும் ஹெலிகாப்டர்களின் சாகச நிகழ்ச்சி நடத்தி காட்டப்பட்டது. நிகழ்ச்சி தொடங்கியதும் விமானப்படை வீரர்கள் பாரா கிளைடிங்கில் பறந்து வந்து கீழே குதித்தனர்.

அதைத்தொடர்ந்து விமானப்படை வீரர்கள் 5 கிலோ எடையுள்ள துப்பாக்கியை கையில் ஏந்தி மேலே அந்தரத்தில் தூக்கிப்போட்டும், சுழற்றியும் பல்வேறு சாகசங்களை செய்து காட்டினார்கள். வரிசையாக நடந்து சென்ற 10 வீரர்களின் கையில் இருந்த துப்பாக்கி கண்ணிமைக்கும் நேரத்தில் பின்னால் நடந்து வந்த வீரரின் கைக்கு மாறியதை பார்வையாளர்கள் கண்டு ரசித்தனர்.

அதன்பின்னர் ‘சராங்’ என்ற ஹெலிகாப்டர் சாகச குழுவினர் விண்ணில் பறந்து சென்று சாகச செயல் களை நிகழ்த்தினர். அப்போது 4 ஹெலிகாப்டர்கள் சம தூரத்தில் பறந்தும், ஒரு ஹெலிகாப்டர் ஒரு திசையில் இருந்து வர, எதிர்திசையில் வந்த 3 ஹெலிகாப்டர்கள் அந்த ஹெலிகாப்டர் மீது மோதுவது போல வந்து திடீரென்று அப்படியே திரும்பி சென்றது பார்வையாளர்களை ஆச்சரியத்தில் ஆழ்த்தியது.

பல ஆயிரம் அடி உயரத்தில் பறந்து வந்த 4 ஹெலிகாப்டர்களும் புகையை கக்கியவாறு தரையை நோக்கி பாய்வது போல வந்து திடீரென்று அப்படியே செங்குத்தாக மேலே எழும்பி சென்றது பார்வையாளர்களை கைதட்ட வைத்தது. அடுத்தடுத்து சம தூரத்தில் பறந்து வந்த 4 ஹெலிகாப்டர்களில் திடீ ரென்று 2 ஹெலிகாப்டர்கள் வலது பக்கமும், 2 ஹெலிகாப்டர்கள் இடது புறமும் திரும்பி ஒன்றோடு ஒன்று மோதுவது போல சென்றது பார்வையாளர்களை பரவசம் அடைய செய்தது. ஹெலிகாப்டர்கள் குறைந்தபட்சம் 50 மீட்டர் உயரத்தில் தான் பறக்க முடியும். அந்த உயரத்தில் பறந்து வந்த 4 ஹெலிகாப்டர்களும் திடீரென்று ஒரு ஹெலிகாப்டர் செங்குத்தாக மேலே எழும்பியும், ஒரு ஹெலிகாப்டர் வலது புறமும், மற்றொரு ஹெலிகாப்டர் இடது புறமும், மற்றொரு ஹெலிகாப்டர் அவற்றிற்கு கீழ் தாழ்வாக பறந்து சென்றது ஆச்சரியப்பட வைத்தது.

அடுத்து உள்நாட்டு தயாரிப்பான ‘தேஜஸ்’ போர் விமானம் பயங்கர சத்தத்துடன் தரையில் இருந்து புறப்பட்டு புகையை கக்கியவாறு விண்ணில் பல்வேறு சாகசங்களை செய்தது. அதன் விமானி விண் ணில் செங்குத்தாகவும், குட்டிக்கரணம் அடித்தும், மிக குறைந்த வேகத்தில் சென்றும் பார்வையாளர்களை வியப்பில் ஆழ்த்தினார்.