ஆண்டிப்பட்டியில், ஆட்டோ மீது அரசு பஸ் மோதல் - ஒரே குடும்பத்தில் 4 பேர் பலி

ஆண்டிப்பட்டி,

தேனி கம்போஸ்ட் ஓடை தெருவில் வசித்து வந்தவர் சென்றாயன்(வயது42). இவர் தேனி புதிய பஸ் நிலையத்தில் உள்ள ஒரு டீக்கடையில் மாஸ்டராக வேலை செய்து வந்தார். இவரது மனைவி சுதா(35). இவர்களது மகன் லோகமணி(10), மகள்அபிநயா(7). இதில் லோகமணி 5-ம் வகுப்பும், மகள் அபிநயா 2-ம் வகுப்பும் படித்து வந்தனர். சிவராத்திரியையொட்டி நேற்று சென்றாயன் தனது மனைவி, மகன், மகள் மற்றும் மாமியார் பொன்னுத்தாயுடன் உசிலம்பட்டி அருகே உள்ள தனது குலதெய்வ கோவிலுக்கு சாமி கும்பிட ஆட்டோவில் சென்றார். ஆட்டோவை சுக்குவாடன்பட்டியை சேர்ந்த ராமு(20) ஓட்டினார். ஆண்டிப்பட்டி அரசு ஆண்கள் மேல்நிலைப்பள்ளி அருகே சென்ற போது மதுரையில் இருந்து தேனி நோக்கி வந்த அரசு பஸ் எதிர்பாராதவிதமாக ஆட்டோ மீது பயங்கரமாக மோதியது.

கண்ணிமைக்கும் நேரத்தில் நடந்த இந்த விபத்தில் ஆட்டோ அப்பளம் போல நொறுங்கியது. மேலும் ஆட்டோவில் பயணம் செய்த அனைவரும் ஆங்காங்கே தூக்கி வீசப்பட்டனர். இந்த கொடூர விபத்தில் சென்றாயன், மனைவி சுதா, மகள் அபிநயா(7) ஆகிய 3 பேரும் உடல்நசுங்கி சம்பவ இடத்திலேயே பரிதாபமாக இறந்தனர். சென்றாயனின் மகன் லோகமணி, மாமியார் பொன்னுத்தாய், ஆட்டோ டிரைவர் ராமு ஆகியோர் பலத்த காயம் அடைந்தனர்.

இந்த விபத்து குறித்து தகவல் கிடைத்ததும் போலீஸ் துணை சூப்பிரண்டு சீனிவாசன் தலைமையில் ஆண்டிப்பட்டி போலீசார் விரைந்து வந்து மீட்பு பணியில் ஈடுபட்டனர். அவர்கள் காயம் அடைந்தவர்களை சிகிச்சைக்காக தேனி அரசு மருத்துவக்கல்லூரி மருத்துவமனைக்கு ஆம்புலன்ஸ் மூலம் அனுப்பி வைத்தனர். ஆனால் செல்லும் வழியிலேயே லோகமணி பரிதாபமாக இறந்தான்.

இந்த விபத்து தொடர்பாக ஆண்டிப்பட்டி போலீசார் வழக்குப்பதிவு செய்து அரசு பஸ் டிரைவர் உசிலம்பட்டியை சேர்ந்த கருப்பசாமியை கைது செய்து விசாரணை நடத்தி வருகின்றனர். கோவிலுக்கு சென்ற போது ஒரே குடும்பத்தை சேர்ந்த 4 பேர் விபத்தில் பலியான சம்பவம் அப்பகுதியில் பெரும் சோகத் தை ஏற்படுத்தியுள்ளது.