பேரூராட்சிக்குட்பட்ட பகுதியில் சார்பதிவாளர் அலுவலகம் அமைக்க கோரி பொதுமக்கள் ஆர்ப்பாட்டம்

கும்மிடிப்பூண்டி,

திருவள்ளூர் மாவட்டம் கும்மிடிப்பூண்டி பஜாரில் தற்காலிக கட்டிடத்தில் சார்பதிவாளர் அலுவலகம் இயங்கி வருகிறது. இதற்கான சொந்த கட்டிடம் கட்டுவதற்கு தமிழக அரசு ரூ.82 லட்சம் நிதி ஒதுக்கியது. கும்மிடிப்பூண்டி தாசில்தார் அலுவலகம் அருகே பெத்திக்குப்பம் ஊராட்சிக்குட்பட்ட பகுதியில் 10 செண்ட் இடத்தில் புதிய கட்டிடம் கட்டுவதற்கு கடந்த 8-ந் தேதி பூமி பூஜை நடைபெற்றது.


இந்த நிலையில், மேற்கண்ட நடவடிக்கையை கண்டித்தும், பேரூராட்சி அலுவலகம் அருகே ஏற்கனவே ஒதுக்கீடு செய்யப்பட்ட அரசு நிலத்தில் சார்பதிவாளர் அலுவலக கட்டிடத்தை அமைக்க கோரியும் கும்மிடிப்பூண்டி சார்பதிவாளர் அலுவலகம் முன்பு நேற்று கண்டன ஆர்ப்பாட்டம் நடைபெற்றது.

ஆர்ப்பாட்டத்தில் வழக்கறிஞர் வேலு தலைமை தாங்கினார். இதில் கும்மிடிப்பூண்டி பேரூராட்சி முன்னாள் தலைவர்கள், வார்டு உறுப்பினர்கள், அரசியல் கட்சி நிர்வாகிகள், மகளிர் குழுக்களை சேர்ந்த பெண்கள் மற்றும் பொதுமக்கள் கலந்து கொண்டனர்.