மக்களை ஏமாற்ற தேவேகவுடா குடும்பத்தினர் முதலை கண்ணீர் வடிக்கிறார்கள் எடியூரப்பா கடும் தாக்கு

சிக்கமகளூரு,

முன்னாள் முதல்-மந்திரியும், கர்நாடக பா.ஜனதா தலைவருமான எடியூரப்பா நேற்று சிக்கமகளூரு மாவட்டம் சிருங்கேரிக்கு வந்தார். அவர் சிருங்கேரி சாரதம்மா கோவிலுக்கு சென்று சாமி தரிசனம் செய்தார்.

பின்னர் அவர், சிருங்கேரி மடத்தின் மடாதிபதி பாரதி தீர்த்த சங்கராச்சாரியை சந்தித்து ஆசிப்பெற்றார். இதையடுத்து எடியூரப்பா நிருபர்களுக்கு பேட்டி அளித்தார். அப்போது அவர் கூறியதாவது:-

இந்தியா முழுவதும் மீண்டும் மோடி அலை அதிகரித்து உள்ளது. கடந்த நாடாளுமன்ற தேர்தலை விட இந்த தடவை 12 சதவீதம் கூடுதலாக வாக்குகள் வாங்குவோம் என்று நம்பிக்கை உள்ளது. அனைத்து கருத்து கணிப்புகளும் மோடியே மீண்டும் பிரதமராவார் என்று கூறுகின்றன. கர்நாடகத்தில் நாடாளுமன்ற தேர்தலில் போட்டியிடும் வேட்பாளர்களின் பட்டியல் தயாராகி உள்ளது. கட்சி மேலிடம் ஒப்புதல் வழங்கிய பிறகு வேட்பாளர்கள் பட்டியல் வெளியிடப்படும்.

வருகிற 17-ந்தேதி பா.ஜனதா கூட்டம் நடக்கிறது. இதனால் இன்னும் ஓரிரு நாட்களில் வேட்பாளர்கள் பட்டியல் வெளியிடப்படும். கர்நாடகத்தில் 22 இடங்களில் பா.ஜனதா வெற்றி பெறும்.

காங்கிரஸ்-ஜனதா தளம்(எஸ்) கட்சிகள் இடையே தொகுதியை பங்கீட்டு கொள்வதில் பிரச்சினை நிலவுகிறது.

தேர்தலில் வெற்றி பெறுவதற்காக தேவேகவுடா குடும்பத்தினர் முதலை கண்ணீர் வடிக்கிறார்கள். மக்களை அவர்கள் ஏமாற்றுகிறார்கள். இந்த நடிப்பை மக்கள் நம்பமாட்டார்கள். இவ்வாறு அவர் கூறினார்.