திருவண்ணாமலையில் சித்ரா பவுர்ணமியன்று அன்னதானம் வழங்க விரும்புவோர் விண்ணப்பிக்கலாம் 12-ந் தேதி கடைசி நாள்

திருவண்ணாமலை,

திருவண்ணாமலையில் உள்ள அருணாசலேஸ்வரர் கோவில் பஞ்சபூத ஸ்தலங்களில் அக்னி ஸ்தலமாக விளங்குகிறது. இங்கு தினமும் உள்ளூர் மட்டுமின்றி வெளியூர், வெளிமாநிலங்களில் இருந்தும் ஏராளமான பக்தர்கள் வந்து சாமி தரிசனம் செய்கின்றனர். மேலும் பக்தர்கள் நகரில் உள்ள மலையை சுற்றி 14 கிலோ மீட்டர் கிரிவலம் செல்கின்றனர். பவுர்ணமி நாட்களில் ஆயிரக்கணக்கான பக்தர்கள் கிரிவலம் செல்கின்றனர். இதில் கார்த்திகை மாதத்தில் வரும் மகா தீபத் திருவிழாவின் போதும், சித்திரை மாதத்தில் வரும் சித்ரா பவுர்ணமியன்றும் லட்சக்கணக்கான பக்தர்கள் கிரிவலம் செல்வார்கள்.

இந்த ஆண்டுக்கான சித்ரா பவுர்ணமி வருகிற 18-ந் தேதி இரவு 7.05 மணிக்கு தொடங்கி மறுநாள் மாலை 5.35 மணிக்கு நிறைவடைகிறது. அன்று திருவண்ணாமலையில் சுமார் 15 லட்சம் மக்கள் கிரிவலம் செல்ல வாய்ப்புள்ளது.

அதனால் நகரத்தையும், மலை சுற்றும் கிரிவலப்பாதையையும் சுத்தமாகப் பராமரிப்பது நமது ஒவ்வொருவரின் கடமையாகும். குறிப்பாக மலை சுற்றும் பாதையில் அன்னதானம் வழங்கவுள்ள தனிநபர்கள் மற்றும் நிறுவனங்கள் மேற்கொள்ள வேண்டிய கட்டுப்பாடுகள் குறித்து திருவண்ணாமலை மாவட்ட கலெக்டர் கே.எஸ்.கந்தசாமி வெளியிட்டு உள்ள செய்திக்குறிப்பில் கூறியிருப்பதாவது:-

சித்ரா பவுர்ணமியன்று அன்னதானம் மேற்கொள்ள விரும்புவோர் வருகிற 2-ந் தேதி (செவ்வாய்க்கிழமை) முதல் வருகிற 12-ந் தேதி (வெள்ளிக்கிழமை) வரை திருவண்ணாமலை கலெக்டர் அலுவலக வளாகத்தில் 2-ம் மாடியில் உள்ள ஊரக வளர்ச்சி உதவி இயக்குனர் (ஊராட்சிகள்) அலுவலகத்தில் வேலை நாட்களில் அலுவலக நேரத்தில் விண்ணப்ப படிவம் பெற்று கொள்ளலாம்.

பூர்த்தி செய்யப்பட்ட விண்ணப்பங்கள் உரிய விவரங்களுடன் வருகிற 12-ந் தேதிக்கு முன் சமர்ப்பித்து அனுமதி பெற வேண்டும். நிர்ணயிக்கப்பட்ட தேதிக்கு பின்னர் எந்த காரணத்தை கொண்டும் விண்ணப்பங்கள் ஏற்று கொள்ளப்படமாட்டாது.

அன்னதானம் வழங்க விண்ணப்பிக்க விரும்புவோர், உரிய விண்ணப்பத்துடன் 5 பாஸ்போர்ட் அளவு புகைப்படங்கள், தங்களது முகவரியை தெரிவிக்கும் ஏதேனும் ஒரு அங்கீகரிக்கப்பட்ட சான்று நகல் மற்றும் எத்தனை நபர்களுக்கு அன்னதானம் வழங்க திட்டமிடப்பட்டுள்ளது என்ற விவரங்களை சமர்ப்பிக்கவேண்டும்.

கிரிவலப்பாதையில் எக்காரணத்தை கொண்டும் உணவு சமைக்கக் கூடாது. அனுமதி வழங்கப்பட்ட அன்னதானம் மட்டுமே வழங்கப்பட வேண்டும். உணவுப்பொருட்கள் தரமானதாகவும், தூய்மையானதாகவும் இருக்க வேண்டும். மேலும் எளிதில் தீப்பற்றக் கூடிய எரிவாயு சிலிண்டர்கள், விறகு அடுப்புகள், மண்எண்ணெய் அடுப்புகள் போன்றவற்றை பயன்படுத்த அனுமதி கிடையாது. அன்னதானம் வழங்க எந்த இடத்தில், எந்த தேதியில், எந்த நேரத்தில் நிர்ணயிக்கப்பட்டு அனுமதி வழங்கப்பட்டுள்ளதோ அந்த இடத்தில் அந்த நேரத்திற்குள்ளாக அன்னதானம் வழங்கி முடிக்கப்பட வேண்டும்.

எந்த காரணத்தை முன்னிட்டும் தடை செய்யப்பட்ட பிளாஸ்டிக் பொருட்களை பயன்படுத்தக் கூடாது. அன்னதானம் வழங்க வாழை இலை, தென்னை மற்றும் பாக்கு மட்டையால் தயார் செய்யப்பட்ட பொருட்களை மட்டுமே பயன்படுத்த வேண்டும். மேலும் பிளாஸ்டிக் பாக்கெட் மூலம் குடிநீர் வினியோகிக்கக் கூடாது.

அன்னதானம் வழங்கும் இடத்திலேயே பக்தர்கள் உணவு அருந்திவிட்டு கழிவுப்பொருட்களை போடுவதற்கு ஏதுவாக குப்பைக் கூடைகளை அன்னதானம் அளிக்கும் நபர்களே எடுத்து வந்து வைத்து குப்பை கழிவுகளை சேகரித்து பின்னர் அப்புறப்படுத்த வேண்டும். அன்னதானம் முடிந்தவுடன் அந்த இடத்தினை சுத்தம் செய்து விட்டு பின்னரே செல்ல வேண்டும். அதற்கு ஏற்ப உரிய நபர்களை உடன் அழைத்து வர தெரிவிக்கப்படுகிறது.

அன்னதானம் அளிப்பதற்கு உரிய விண்ணப்பத்தினை அளித்து அனுமதி பெற்றுக் கொள்ளாதவர்கள் அன்னதானம் வழங்கினால், அவர்கள் மீது போலீசார் மூலம் கடும் நடவடிக்கை எடுக்கப்படும். இந்த நடைமுறைகளைப் பின்பற்றி மலை சுற்றும் கிரிவலப்பாதையினை தூய்மையாக வைத்து கொள்ள அனைத்து தரப்பினர்களையும், பக்தர்களையும் கேட்டுக்கொள்ளப்படுகிறது.

இவ்வாறு அதில் கூறப்பட்டு உள்ளது.