பல்லடம் அருகே கணவரை கொலை செய்த பெண் கைது கட்டிலில் இருந்து விழுந்து இறந்ததாக நாடகமாடியது அம்பலம்

பல்லடம்,

பல்லடம் அருகே உள்ள பொன்னகர் முதல் தெருவை சேர்ந்தவர் சதீஷ்குமார் (வயது 37). இவர் அப்பகுதியில் உள்ள ஒரு பனியன் நிறுவனத்தில் கூலித்தொழிலாளியாக வேலை பார்த்து வந்தார். இவருடைய மனைவி பாக்கியலட்சுமி (30). இவர்களுக்கு ஒரு மகளும், ஒரு மகனும் உள்ளனர்.

இந்த நிலையில் கடந்த சில நாட்களாக சதீஷ்குமார் வேலைக்கு செல்லாமல் மதுகுடித்து விட்டு வந்துள்ளார். மேலும் வீட்டில் உள்ள பொருட்களையும் எடுத்து விற்று அதில் கிடைக்கும் பணத்தைக்கொண்டு மதுகுடித்து விட்டு வந்ததால் கணவன்-மனைவிக்கு இடையே அடிக்கடி தகராறு ஏற்பட்டு வந்துள்ளது.

இந்த நிலையில் கடந்த 27-ந்தேதி சதீஷ்குமார் மதுகுடித்து விட்டு வீட்டிற்கு வந்துள்ளார். அப்போது கணவன்-மனைவிக்கு இடையே தகராறு ஏற்பட்டுள்ளது. இதற்கிடையே மறுநாள் 28-ந்தேதி தனது கணவர் கட்டிலில் இருந்து விழுந்து இறந்து விட்டதாக பல்லடம் போலீஸ் நிலையத்தில் பாக்கியலட்சுமி கூறியுள்ளார். உடனே போலீசார் பிணத்தை கைப்பற்றி பிரேத பரிசோதனைக்காக திருப்பூர் அரசு ஆஸ்பத்திரிக்கு அனுப்பி வைத்தனர்.

அங்கு சதீஷ்குமாரின் உடலை பிரேத பரிசோதனை செய்த டாக்டர்கள் அவர் கழுத்து நெரிக்கப்பட்டு கொலை செய்யப்பட்டிருப்பதாக போலீசாரிடம் தெரிவித்தனர்.

இதையடுத்து பல்லடம் போலீசார் பாக்கியலட்சுமியை போலீஸ் நிலையத்திற்கு அழைத்துச்சென்று தீவிர விசாரணை நடத்தினர். இதில் அவர் தனது கணவரை துண்டால் கழுத்தை நெரித்து கொலை செய்ததையும், கட்டிலில் இருந்து விழுந்து இறந்ததாக நாடகமாடியதையும் ஒப்புக்கொண்டார்.

இதையடுத்து பல்லடம் போலீசார் பாக்கியலட்சுமியை கைது செய்து விசாரணை நடத்தி வருகிறார்கள். மனைவியே கணவனை துண்டால் கழுத்தை நெரித்து கொன்ற சம்பவம் பல்லடம் பகுதியில் பெரும் பரபரப்பை ஏற்படுத்தி உள்ளது.