விளையாட்டு, வீர- தீர செயல்களில், சாதனை படைத்தவர்களுக்கு மத்திய அரசின் விருதுகள் - விண்ணப்பிக்க 20-ந்தேதி கடைசி நாள்

கடலூர்,

மத்திய அரசு, 2019-ம் ஆண்டிற்கான விளையாட்டு, அமைதி, வீர- தீர செயல்கள் போன்ற பாராட்டத்தக்க வகையில் சாதனைப்படைத்ததற்காக பல்வேறு விருதுகளை அறிவித்துள்ளது. இதன்படி மத்திய அரசின் 2019-ம் ஆண்டுக்கான காந்தி அமைதி பரிசு விருது, அமைதி வழியில் சமூக, பொருளாதார மற்றும் அரசியல் மாற்றங்கள் ஏற்படுத்திய தலைசிறந்த தனிநபர்கள் மற்றும் தொண்டு நிறுவனங்களுக்கும், 2019-ம் ஆண்டிற்கான தயான்சந்த் விருது விளையாட்டில் சிறப்பான சாதனை படைத்து, தொடர்ந்து விளையாட்டின் வளர்ச்சிக்கு பாடுபடும் விளையாட்டு ஆர்வலர்களுக்கும் வழங்கப்படுகிறது.

அர்ஜூனா விருது, விளையாட்டில் பன்னாட்டு அளவில் கடந்த 3 ஆண்டுகள் சிறப்பான சாதனை படைத்து, தொடர்ந்து விளையாட்டுக்கு தலைமை பொறுப்பேற்று வழிநடத்தும் விளையாட்டு வீரர்களுக்காக வழங்கப்படுகிறது.

ராஜீவ்காந்தி கேல் ரத்னா விருதானது அங்கீகரிக்கப்பட்ட பன்னாட்டு அளவிலான விளையாட்டு போட்டியில் சிறப்பான சாதனை படைத்தவர்களுக்கு வழங்கப்பட்டு வருகிறது. துரோணாச்சாரியா விருதானது 3 ஆண்டுகள் குறிப்பிடத்தக்க விளையாட்டு சாதனையாளர்களை உருவாக்கிய விளையாட்டு பயிற்சியாளர்களுக்கு வழங்கப்படுகிறது. ராஷ்ட்ரிய கேல் புரோட்ஸஉறான் புரஸ்கார் விருது, இந்த விருது விளையாட்டின் மேம்பாட்டுக்கும் வளர்ச்சிக்கும் சிறப்பான பங்களித்த நிறுவனங்களுக்கு வழங்கப்பட்டு வருகிறது. அசோக் சக்ராவின் கேலன்டரி விருது வீர- தீர செயல் புரிந்தமைக்காக வழங்கப்பட்டு வருகிறது.

எனவே இந்த விருதுகளுக்கு விண்ணப்பிக்க தகுதியானவர்கள், முழு விவரங்களையும், விண்ணப்பங்களையும் www.sdat.tn.gov.in என்ற இணைய தளத்தில் இருந்து பதிவிறக்கம் செய்து கொள்ளலாம்.

பூர்த்தி செய்த விண்ணப்பங்களை வருகிற 20-ந்தேதி (சனிக்கிழமை)க்குள் கடலூர் மாவட்ட விளையாட்டு மற்றும் இளைஞர் நலன் அலுவலருக்கு அனுப்பி வைக்கப்பட வேண்டும். இது பற்றிய மேலும் விவரங்களுக்கு கடலூர் மாவட்ட விளையாட்டு அலுவலரை அணுகலாம்.

மேற்கண்ட தகவலை கலெக்டர் அன்புசெல்வன் வெளியிட்டுள்ள செய்திக் குறிப்பில் தெரிவித்துள்ளார்.