தஞ்சை பெரியகோவிலில் தமிழ்மொழி கல்வெட்டுகள் அகற்றப்பட்டு இந்தி திணிக்கப்படுகிறதா? ஆய்வாளர்கள் அதிர்ச்சி

தஞ்சாவூர்,

தினமும் உள்ளூர் மட்டுமின்றி வெளிமாவட்டம், வெளி மாநிலம் மற்றும் வெளிநாட்டு சுற்றுலா பயணிகள் என ஏராளமானோர் இங்கு வந்து பெரியகோவிலை பார்வையிட்டு பெரிய கோவிலின் கட்டிட கலை, சிற்பக்கலையை கண்டு வியந்து வருகின்றனர். கோவிலுக்கு வருபவர்கள், கோவில் வளாகத்தில் உள்ள சிற்பங்கள், கல்வெட்டுகள், சாமிகளை செல்போனில் படம் பிடித்து அவற்றை தங்களது நண்பர்கள், உறவினர்களுக்கு அனுப்பி வைக்கின்றனர்.

இப்படி பதிவுகளை அனுப்பி வைக்கும்போது சிலர் தவறான தகவல்களை அனுப்பி வைத்து விடுகின்றனர். தஞ்சை பெரியகோவிலில் தமிழ்கல்வெட்டுகளை அகற்றி விட்டு இந்திமொழி கல்வெட்டுகள் பதிக்கப்பட்டு வருவதாக சமூக வலைதளங்களில் வீடியோ ஒன்று பரவியது.

இந்த தகவல் பரவியதால் இந்திமொழி பொறிக்கப்பட்டுள்ளதாக கூறப்பட்டுள்ள இடத்தை பார்ப்பதற்காக வரலாற்று ஆய்வாளர்கள், பொதுமக்கள் நேற்று தஞ்சை பெரிய கோவிலுக்கு திரண்டு வந்தனர்.

அந்த கல்வெட்டை பார்க்கும்போது இந்தி மொழியில் எழுதப்பட்டதைபோல் தான் தெரிகிறது. அது உண்மையில்லை. அவைகள் மராத்திமொழி கல்வெட்டுகள் ஆகும். இந்த கல்வெட்டுகள் பல ஆண்டுகளாக இங்குள்ளது. இந்த கல்வெட்டுகளை கடந்த 1990-ம் ஆண்டே படி எடுத்து அதை புத்தகமாக அச்சிடப்பட்டு, சரசுவதி மகால் நூலகம், தமிழ்ப்பல்கலைக்கழகம் ஆகிய இடங்களில் வைக்கப்பட்டுள்ளது.

திருச்சுற்று மாளிகையில் அடுக்கி வைக்கப்பட்டுள்ள கல்வெட்டுகள் அடங்கிய கருங்கல் புதிதாக செய்யப்பட்டதாக இருக்குமோ? என்று சுற்றுலா பயணிகள் சந்தேகப்பட்டனர். ஆனால் அவைகள் அனைத்தும் கோவிலின் வெளிப்புற பாதையை சீரமைத்தபோது பூமிக்கடியில் கண்டெடுக்கப்பட்டவை. அதை பாதுகாப்பாக அறைக்குள் வைத்து பூட்டி வைக்கப்பட்டுள்ளது.

இது குறித்து இந்திய தொல்லியல்துறை முதுநிலை பராமரிப்பு அலுவலர் சங்கர் கூறும்போது, மாமன்னன் ராஜராஜ சோழன் கி.பி.985-ம் ஆண்டு ஆட்சி அரியணையில் ஏறினார். கலை மற்றும் ஆன்மிகத்தில் ஈடுபாடு கொண்டு விளங்கியதால் தஞ்சையில் பெரிய கோவிலை கட்டினார். சேரர்களை ராஜராஜசோழன் வெற்றி பெற்றதன் நினைவாக கேரளாந்தகன் நுழைவு வாயிலை எழுப்பினார். ராஜராஜ சோழன் காலத்தில் கோவில் பணியாளர்கள் விவரம், கொடுக்கப்பட்ட தானங்கள், கோவில் நிர்வாகம், ஆட்சி முறை, பாதுகாப்பு முதலான பல தகவல்கள் கோவில் முழுவதும் கல்வெட்டுகளாக பதிவு செய்யப்பட்டன.


வரலாற்று ஆய்வாளர்கள் கூறும்போது, தஞ்சை பெரிய கோவிலில் ராஜராஜ சோழனால் பொறிக்கப் பட்ட 64 கல்வெட்டுகளும், ராஜேந்திரசோழனால் 21 கல்வெட்டுகளும், 2-ம் ராஜேந்திர சோழனின் ஒரு கல்வெட்டு, முதலாம் குலோத்துங்கனின் ஒரு கல்வெட்டு, 3-ம் குலோத்துங்கனின் ஒரு கல்வெட்டு, மூன்றாம் ராஜேந்திரனின் ஒரு கல்வெட்டு, பாண்டியரின் 2 கல்வெட்டுகள், விஜயநகர நாயக்கர் காலத்தை சேர்ந்த 4 கல்வெட்டுகள், மராத்திய காலத்தை சேர்ந்த 4 கல்வெட்டுகள் ஆகியவை உள்ளன.

மராட்டியர்களின் மராத்தி மொழி கல்வெட்டுகள் தான் தற்போது சர்ச்சைக்குள்ளாகியுள்ளன. இக்கல்வெட்டுகள் மராத்தி மொழியில் தான் பொறிக்கப்பட்டுள்ளன, இந்தி மொழியில் அல்ல. மராத்தியும், இந்தியும், தேவநாகரி என்னும் வரிவடிவ அமைப்பில் எழுதப்படுவதால் பார்ப்பதற்கு இரண்டும் ஒரே வடிவமாக தான் தோன்றும் என்றனர்.

கடந்த சில நாட்களாக சமூக வலைதளங்களில் தஞ்சை பெரிய கோவிலில் தமிழ் எழுத்துக்கள் கொண்ட கல்வெட்டுகளை அகற்றி விட்டு அங்கு இந்தி எழுத்துக்களை வைத்திருப்பதாகவும், பல இடங்களில் வைப்பதற்கு அங்கு இந்தியில் பொறிக்கப்பட்டுள்ள கல்வெட்டுகளை அடுக்கி வைத்திருப்பதாகவும் உண்மைக்கு புறம்பான தகவல் பரவுவது வரலாற்று ஆர்வலர்கள் மத்தியில் அதிர்ச்சியை ஏற்படுத்தியுள்ளது.

எனவே இதுபோன்ற உண்மைக்கு புறம்பான தகவல்களை பரப்புவதை தடுக்க வேண்டும் என பொதுமக்களும், வரலாற்று ஆய்வாளர்களும் கோரிக்கை வைத்துள்ளனர்.