<
திருப்பத்தூர் அருகே, ரெயில் முன் பாய்ந்து அ.தி.மு.க. பிரமுகர் தற்கொலை - தி.மு.க.வினரை கைது செய்யக்கோரி மருத்துவமனை முன்பு தர்ணா
திருப்பத்தூர் அருகே அ.தி.மு.க. பிரமுகர் ரெயில் முன் பாய்ந்து தற்கொலைசெய்து கொண்டார். இதற்கு காரணமான தி.மு.க.வினரை கைது செய்யக்கோரி மருத்துவ மனை முன்பு தர்ணா போராட்டம் நடந்தது.
திருப்பத்தூர்,
திருப்பத்தூர் அருகே உள்ள செவ்வாத்தூர் காமராஜ்நகர் பகுதியை சேர்ந்தவர் ஜெகநாதன் (வயது 45), அ.தி.மு.க. பிரமுகர். இவருக்கு கலா என்ற மனைவியும், 3 குழந்தைகளும் உள்ளனர். அதே பகுதியை சேர்ந்தவர்கள் முருகன், மாதையன், எத்திராஜ், கண்ணகி. இவர்கள் தி.மு.க.வைச் சேர்ந்தவர்கள்.
கடந்த 19-ந் தேதி வீட்டின் சுவரில் வரையப்பட்ட உதயசூரியன் சின்னத்தின் மீது ஜெகநாதன் ஆயில் ஊற்றியதாக கூறி, அவரிடம் தி.மு.க.வினர் தகராறில் ஈடுபட்டனர். மேலும் இதுதொடர்பாக அவர்கள் ஜெகநாதன் மீது கந்திலி போலீஸ் நிலையத்தில் புகார் கொடுத்தனர்.
அதன் அடிப்படையில் கந்திலி போலீசார் நேற்று ஜெகநாதனை போலீஸ் நிலையத்திற்கு அழைத்து வருமாறு அவருடைய மனைவி கலா மற்றும் உறவினர்களிடம் கூறினர்.
இதனால் மனமுடைந்த ஜெகநாதன் செவ்வாத்தூர் அருகில் ரெயில் முன் பாய்ந்து தற்கொலை செய்து கொண்டார். அவரது உடலை ஜோலார்பேட்டை ரெயில்வே போலீசார் கைப்பற்றி, பிரேத பரிசோதனைக்காக திருப்பத்தூர் அரசு மருத்துவமனைக்கு அனுப்பி வைத்தனர்.
இந்த நிலையில் ஜெகநாதனின் உறவினர்கள் தற்கொலைக்கு காரணமான தி.மு.க.வினரை உடனடியாக கைது செய்யக்கோரி திருப்பத்தூர் அரசு மருத்துவமனை முன்பு தர்ணா போராட்டத்தில் ஈடுபட்டனர். மேலும் ஜெகநாதனின் உடலையும் அவர்கள் வாங்க மறுத்தனர்.
இதுகுறித்து தகவல் அறிந்ததும் திருப்பத்தூர் துணை போலீஸ் சூப்பிரண்டு தங்கவேல் மற்றும் போலீசார் விரைந்து சென்று போராட்டத்தில் ஈடுபட்டவர்களை சமாதானம் செய்து, நடவடிக்கை எடுப்பதாக உறுதியளித்தனர். அதன் பேரில் அவர்கள் ஜெகநாதனின் உடலை வாங்கி கொண்டு, அங்கிருந்து கலைந்து சென்றனர்.
இந்த சம்பவம் அப்பகுதியில் பெரும் பரபரப்பை ஏற்படுத்தியது.
Related Tags :
Next Story
"Daily Thanthi" a prestigious product from The Thanthi Trust
எங்களைப்பற்றி தனித்தன்மை பாதுகாப்பு தொடர்புகொள்ள வலைத்தள தொகுப்பு ஆலோசனைகள் வேலைவாய்ப்பு
Paper Ad Tariff Web Ad Tariff Terms & Conditions (E-paper)
காப்புரிமை 2024, © The Thanthi Trust Powered by Hocalwire
