பந்தலூர் அருகே, சிறுத்தைப்புலி தாக்கி பசுமாடு சாவு - கூண்டு வைத்து பிடிக்க கோரிக்கை

பந்தலூர்,

பந்தலூர் அருகே மேங்கோரேஞ்சு பகுதியில் சிறுத்தைப்புலி நடமாட்டம் உள்ளது. இரவில் ஊருக்குள் புகுந்து மாடு, ஆடு உள்பட வளர்ப்பு பிராணிகளை சிறுத்தைப்புலி தாக்கி கொன்று வருகிறது. இதனால் சிறுத்தைப்புலி நடமாட்டத்தை கட்டுப்படுத்த வேண்டும் என்று வனத்துறைக்கு அப்பகுதி மக்கள் கோரிக்கை விடுத்தனர். ஆனால் நடவடிக்கை எடுக்கப்படவில்லை என கூறப்படு கிறது.

இந்த நிலையில் அதே பகுதியை சேர்ந்த சேகர் என்பவர் தனது வீட்டில் பசுமாடுகளை வளர்த்து வந்தார். நேற்று முன்தினம் காலையில் வழக்கம்போல் பசுமாடுகள் மேய்ச்சலுக்கு சென்றன. இதில் ஒரு மாடு வீடு வந்து சேரவில்லை. இதனால் சேகர் குடும்பத்தினர் காணாமல் போன பசுமாட்டை பல இடங்களில் தேடினர்.

அப்போது மேய்ச்சலுக்கு சென்ற இடத்தில் சிறுத்தைப்புலி தாக்கி பசுமாடு இறந்து கிடந்தது. இதுகுறித்து தேவாலா வனத்துறையினருக்கு தகவல் கொடுக்கப்பட்டது. இதன்பேரில் வனச்சரகர் சரவணன் தலைமையில் வன காப்பாளர் லூயிஸ் உள்ளிட்ட வனத்துறையினர் சம்பவ இடத்துக்கு விரைந்து வந்து பார்வையிட்டனர். அப்போது சிறுத்தைப்புலியின் கால் தடங்கள் அப்பகுதியில் பதிவாகி இருந்தது.

இதைத்தொடர்ந்து கால்நடை டாக்டர் பாலாஜி வரவழைக்கப்பட்டு பசுமாட்டின் உடல் பிரேத பரிசோதனை செய்யப்பட்டது. அப்போது சிறுத்தைப்புலி தாக்கி பசுமாடு இறந்தது உறுதியானது. பின்னர் பாதிக்கப்பட்ட சேகர் உரிய ஆவணங்களை தாக்கல் செய்தவுடன் அதற்கான இழப்பீடு தொகை வழங்கப்படும் என்று வனத்துறையினர் தெரிவித்தனர்.

அப்போது சிறுத்தைப்புலியை கூண்டு வைத்து பிடிக்க வேண்டும் என்று வனத்துறையினரிடம் பொதுமக்கள் கோரிக்கை விடுத்தனர்.