பிளஸ்-1 வகுப்பில் சேர விண்ணப்பங்கள் வினியோகம் 30-ந்தேதி தொடங்குகிறது

புதுச்சேரி, 

புதுவை கல்வித்துறை இணை இயக்குனர் குப்புசாமி விடுத்துள்ள செய்திக்குறிப்பில் கூறியிருப்பதாவது:-

2019-20ஆம் கல்வி ஆண்டில் புதுச்சேரி பகுதியில் உள்ள அரசினர் மேல்நிலைப்பள்ளிகளில் 11-ம் வகுப்பு மாணவர் சேர்க்கைக்கான விண்ணப்பங்கள் வருகிற 30-ந்தேதி முதல் அனைத்து அரசினர் மேல்நிலை பள்ளிகளிலும் வினியோகிக்க ஏற்பாடு செய்யப்பட்டுள்ளது. 11-ம் வகுப்பில் சேர விரும்பும் மாணவ, மாணவிகள் எந்தெந்த பள்ளிகளில் சேர விரும்புகின்றனரோ அப்பள்ளிகளில் தனித்தனியே விண்ணப்பத்தினை பெற்று பூர்த்தி செய்து, மே 14-ந்தேதி மாலை 4 மணிக்குள் இணையதள மதிப்பெண் சான்றிதழ் நகலையும், நிரந்தர ஒருங்கிணைந்த சான்றிதழ், மாற்று சான்றிதழ் மற்றும் சிறப்பு ஒதுக்கீட்டிற்கான சான்றிதழ் ஏதேனும் இருப்பின் அதனையும் இணைத்து அந்தந்த பள்ளிகளிலேயே சமர்ப்பிக்குமாறு கேட்டுக்கொள்ளப்படுகிறார்கள்.

ஒரு மாணவர் விரும்பினால் எத்தனை பள்ளிகளில் வேண்டுமானாலும் விண்ணப்பிக்கலாம். அவ்விண்ணப்பங்கள் பள்ளிகளில் பரிசீலனை செய்யப்பட்டு மே 21-ந்தேதி தர வரிசை பட்டியல் வெளியிடப்பட்டு 22-ந்தேதி முதல் 11-ம் வகுப்பு மாணவர் சேர்க்கை அந்தந்த பள்ளிகளிலேயே நடைபெறும்.

விண்ணப்ப படிவத்தினை பள்ளி கல்வித்துறையின் இணையதள முகவரியிலிருந்து பதிவிறக்கம் செய்துகொள்ளலாம். அரசு பள்ளி மாணவர்களுக்கான மதிப்பெண் மற்றும் இடஒதுக்கீட்டின் அடிப்படையில் கலந்தாய்வு அடுத்த மாதம் (மே) 22-ந்தேதி முதல் 24-ந்தேதி வரை நடைபெறும். அரசு உதவி பெறும் பள்ளி மாணவர்களுக்கான மதிப்பெண் மற்றும் இடஒதுக்கீட்டின் அடிப்படையில் மே 28-ந்ே-தி கலந்தாய்வு நடைபெறும்.

தனியார் பள்ளி மாணவர்களுக்கான மதிப்பெண் மற்றும் இடஒதுக்கீட்டின் அடிப்படையில் கலந்தாய்வு மே 30-ந்தேதி நடைபெறும். ஜூன் மாதம் 3-ந்தேதி வகுப்புகள் தொடங்கும்.

இவ்வாறு இணை இயக்குனர் குப்புசாமி கூறியுள்ளார்.