மாவட்டத்தில் எஸ்.எஸ்.எல்.சி. பொதுத்தேர்வில் 95.5 சதவீத மாணவ-மாணவிகள் தேர்ச்சி

சேலம், 

தமிழகத்தில் கடந்த மார்ச் மாதம் எஸ்.எஸ்.எல்.சி. பொதுத்தேர்வு நடந்தது. விடைத்தாள்கள் திருத்தும் பணிகள் முடிவடைந்ததை தொடர்ந்து நேற்று எஸ்.எஸ்.எல்.சி. பொதுத்தேர்வு முடிவுகள் வெளியிடப்பட்டன. இதில் சேலம் மாவட்டத்தில் எஸ்.எஸ்.எல்.சி பொதுத் தேர்வை அரசு மற்றும் அரசு உதவிபெறும் பள்ளிகள், மாநகராட்சி பள்ளிகள், சிறப்பு பள்ளிகள், சுயநிதி பள்ளிகள் மற்றும் தனியார் மெட்ரிக் பள்ளிகள் என 532 பள்ளிகளை சேர்ந்த 44 ஆயிரத்து 333 மாணவ, மாணவிகள் தேர்வு எழுதி இருந்தனர். அவர்களில் 42 ஆயிரத்து 336 மாணவ, மாணவிகள் தேர்ச்சி பெற்றனர். சேலம் மாவட்ட கலெக்டர் அலுவலகத்தில் உள்ள மாவட்ட முதன்மை கல்வி அலுவலகத்தில் நேற்று காலை எஸ்.எஸ்.எல்.சி. பொதுத்தேர்வு முடிவுகளையும், தேர்ச்சி சதவீதம் விவரங்கள் அடங்கிய பட்டியலையும் மாவட்ட முதன்மை கல்வி அலுவலர் கணேஷ்மூர்த்தி வெளியிட்டார். தேர்வு முடிவுகள் பற்றிய விவரம் வருமாறு:-

சேலம் மாவட்டத்தில் எஸ்.எஸ்.எல்.சி. பொதுத்தேர்வு எழுதிய 22 ஆயிரத்து 221 மாணவர்களில், 20 ஆயிரத்து 904 பேர் தேர்ச்சி பெற்றனர். இது 94.07 சதவீதம் ஆகும். மாணவிகளில் 22 ஆயிரத்து 112 பேர் தேர்வு எழுதியதில், 21 ஆயிரத்து 432 பேர் தேர்ச்சி பெற்றனர். இது 96.92 சதவீதம் ஆகும். மொத்தம் 44 ஆயிரத்து 333 மாணவ-மாணவிகள் தேர்வு எழுதியதில் 42 ஆயிரத்து 336 பேர் தேர்ச்சி பெற்றனர். மொத்த தேர்ச்சி சதவீதம் 95.5 சதவீதம் ஆகும். கடந்த ஆண்டு 95.08 சதவீதம் தேர்ச்சி ஆகும். கடந்த ஆண்டை காட்டிலும் இந்த ஆண்டு 0.42 சதவீதம் தேர்ச்சி அதிகமாகும். மாணவர்களை விட மாணவிகள் 2.85 சதவீத பேர் அதிகம் தேர்ச்சி பெற்றுள்ளனர். மேலும் மாற்றுத்திறனாளிகள் 207 பேர் தேர்வு எழுதியதில், 191 பேர் தேர்ச்சி பெற்றனர். எஸ்.எஸ்.எல்.சி. பொதுத்தேர்வில் தேர்ச்சி அடைந்த மாணவ-மாணவிகளுக்கு நாளைமறுநாள் (வியாழக்கிழமை) முதல் தற்காலிக மதிப்பெண் சான்றிதழ்களை அவர்களது பள்ளியில் பெற்றுக்கொள்ளலாம் என்றும், மறுக்கூட்டலுக்கு மாணவ-மாணவிகள் நாளைமறுநாள் முதல் 4-ந் தேதி வரை விண்ணப்பிக்கலாம் என்றும் மாவட்ட முதன்மை கல்வி அலுவலர் கணேஷ்மூர்த்தி தெரிவித்துள்ளார்.

தமிழகத்தில் எஸ்.எஸ்.எல்.சி. தேர்வு நடந்த 32 மாவட்டங்களில் திருப்பூர் மாவட்டம் ‘ரேங்க்‘ பட்டியலில் முதலிடத்தில் உள்ளது. சேலம் மாவட்டம் ‘ரேங்க்‘ பட்டியலில் 21-வது இடத்தில் உள்ளது. கடந்த ஆண்டு எஸ்.எஸ்.எல்.சி. பொதுத்தேர்வு முடிவில் 19-வது இடத்தில் இருந்த சேலம் மாவட்டம் இந்த ஆண்டு 2 இடங்கள் பின்தங்கி 21-வது இடத்தை பிடித்திருக்கிறது என்பது குறிப்பிடத்தக்கது.

எஸ்.எஸ்.எல்.சி. பொதுத்தேர்வு முடிவுகள் வெளியாகும் என்று அறிவிக்கப்பட்டதால் தேர்வு எழுதிய மாணவ-மாணவிகள் நேற்று தங்களது பள்ளிக்கு காலையில் ஆர்வமுடன் வந்து காத்திருந்தனர். தேர்வு முடிவுகள் வெளியானதை தொடர்ந்து மாணவ-மாணவிகளின் செல்போனுக்கு எஸ்.எம்.எஸ். மூலம் முடிவுகள் அனுப்பி வைக்கப்பட்டன. சில மாணவ-மாணவிகள் தங்களது செல்போன்களை பள்ளிக்கு எடுத்து வந்து தேர்வு முடிவு மற்றும் மதிப்பெண்களை பார்த்து, மகிழ்ச்சியை பகிர்ந்து கொண்டனர்.