தூத்துக்குடி மாவட்டத்தில் எஸ்.எஸ்.எல்.சி. தேர்வில் 96.95 சதவீதம் மாணவ-மாணவிகள் தேர்ச்சி

தூத்துக்குடி,

தமிழ்நாட்டில் எஸ்.எஸ்.எல்.சி. தேர்வு முடிவுகள் நேற்று வெளியிடப்பட்டன. தூத்துக்குடி மாவட்டத்தில் மாவட்ட முதன்மை கல்வி அலுவலர் முருகேசன் மேற்பார்வையில், தேர்வு முடிவுகள் அந்தந்த பள்ளிகளிலேயே பதிவிறக்கம் செய்து, அறிவிப்பு பலகையில் ஒட்டப்பட்டன. இதனை மாணவ-மாணவிகள் ஆர்வமுடன் பார்வையிட்டனர். இதேபோன்று மாணவ-மாணவிகளின் செல்போன் மற்றும் இணையதளத்திலும் மதிப்பெண் பட்டியல் வெளியிடப்பட்டதால், எளிதில் மாணவர்கள் மதிப்பெண்களை அறிந்து கொண்டனர்.

தூத்துக்குடி மாவட்டத்தில் உள்ள 86 அரசு பள்ளிகள் உள்பட 301 பள்ளிக்கூடங்களை சேர்ந்த மாணவ-மாணவிகள் எஸ்.எஸ்.எல்.சி. தேர்வு எழுதினர். இதில் 11 ஆயிரத்து 225 மாணவர்கள், 11 ஆயிரத்து 861 மாணவிகள் என மொத்தம் 23 ஆயிரத்து 86 பேர் தேர்வு எழுதினர். இதில் 10 ஆயிரத்து 709 மாணவர்கள், 11 ஆயிரத்து 574 மாணவிகள் என மொத்தம் 22 ஆயிரத்து 283 பேர் தேர்ச்சி பெற்றனர். இது 96.95 சதவீதம் தேர்ச்சி ஆகும். கடந்த ஆண்டு மாநில அளவில் 8-வது இடத்தில் இருந்த தூத்துக்குடி மாவட்டம் இந்த ஆண்டு 2 இடம் பின்தங்கி 10-வது இடத்தில் உள்ளது.

தூத்துக்குடி கல்வி மாவட்டத்தில் தேர்வு எழுதிய 10 ஆயிரத்து 649 மாணவ-மாணவிகளில் 10 ஆயிரத்து 332 பேர் தேர்ச்சி பெற்று உள்ளனர். இது 97.02 சதவீதம் ஆகும். கோவில்பட்டி கல்வி மாவட்டத்தில் தேர்வு எழுதிய 6 ஆயிரத்து 978 மாணவ- மாணவிகளில் 6 ஆயிரத்து 800 பேர் தேர்ச்சி பெற்று உள்ளனர். இது 97.45 சதவீதம் ஆகும். திருச்செந்தூர் கல்வி மாவட்டத்தில் தேர்வு எழுதிய 5 ஆயிரத்து 459 மாணவ-மாணவிகளில், 5 ஆயிரத்து 251 பேர் தேர்ச்சி பெற்று உள்ளனர். இது 96.19 சதவீதம் தேர்ச்சி ஆகும்.