முதன்மை நிலை விளையாட்டு மைய விடுதிகளில் சேர சிறுவர், சிறுமிகள் ஆன்லைனில் விண்ணப்பிக்கலாம் , 20-ந் தேதி கடைசி நாள்

ஊட்டி,

தமிழ்நாடு விளையாட்டு மேம்பாட்டு ஆணையத்தின் மூலம் பள்ளிகளில் பயிலும் சிறுவர், சிறுமிகளுக்கு விளையாட்டுத் துறையில் சாதனைகள் படைப்பதற்கு ஏற்ப பயிற்சி, தங்குமிட வசதி மற்றும் சத்தான உணவுடன் கூடிய 5 முதன்மை நிலை விளையாட்டு மைய விடுதிகள் கீழ்க்கண்ட இடங்களில் செயல்பட்டு வருகின்றன. சிறுவர்களுக்காக சென்னை, திருச்சி, நெல்லை ஆகிய இடங்களிலும், சிறுமிகளுக்காக சென்னை, ஈரோடு ஆகிய இடங்களிலும் முதன்மை நிலை விளையாட்டு மைய விடுதிகள் செயல்படுகிறது.

மேற்கண்ட விடுதிகளில் காலியாக உள்ள விளையாட்டுக்களில் பயிற்சி பெற்று சிறந்த விளையாட்டு வீரர், வீராங்கனையாக விளங்குவதற்கு 6-ம் வகுப்பு, 7-ம் வகுப்பு மற்றும் 8-ம் வகுப்பில் சிறுவர், சிறுமிகளுக்கான மாநில அளவிலான தேர்வு முகாம் வருகிற 21-ந் தேதி காலை 8 மணிக்கு சென்னை ஜவஹர்லால் நேரு விளையாட்டு அரங்கத்தில் நடைபெற உள்ளது. சிறுவர்கள் தடகளம், இறகுப்பந்து, குத்துச்சண்டை, ஜிம்னாஸ்டிக்ஸ், டென்னிஸ், நீச்சல், சிறுமிகள் தடகளம், இறகுப்பந்து, மேஜைப்பந்து, ஜிம்னாஸ்டிக்ஸ் ஆகிய விளையாட்டுகளில் தேர்வு செய்யப்பட உள்ளனர்.

விளையாட்டில் சிறந்து விளங்கும் மற்றும் ஆர்வம் உள்ள மாணவ-மாணவிகள் 2019-2020-ம் ஆண்டு சேர்க்கைக்கான விண்ணப்ப படிவத்தை www.sdat.tn.gov.in என்ற இணையதளத்தில் பதிவிறக்கம் செய்யலாம்.

ஆன்லைன் மூலம் விண்ணப்பத்தை சமர்ப்பிக்க வேண்டிய கடைசி நாள் வருகிற 20-ந் தேதி ஆகும். அன்று மாலை 5 மணிக்குள் சமர்ப்பிக்க வேண்டும். தேசிய மற்றும் மாநில அளவில் வெற்றி பெற்ற மாணவர்களுக்கு முன்னுரிமை வழங்கப்படும்.

எனவே நீலகிரி மாவட்டத்தில் உள்ள பள்ளி சிறுவர், சிறுமிகள் விடுதிகளில் சேர்க்கைக்கு விண்ணப்பித்து பயன்பெறலாம். இவ்வாறு அதில் கூறப்பட்டு உள்ளது.