விருதுநகர் அருகே சாலை சீரமைப்பு பணியில் மெத்தனம்; போராட்டம் நடத்த கிராம மக்கள் முடிவு

விருதுநகர்,

விருதுநகர் அருகே உள்ள கவுண்டம்பட்டியை சேர்ந்த தமிழ்நாடு ஒடுக்கப்பட்டோர் வாழ்வுரிமை இயக்க மாநிலக்குழு உறுப்பினர் முருகேசன் மற்றும் அந்த பகுதியை சேர்ந்த கிராம மக்கள் கடந்த ஆண்டு மாவட்ட நிர்வாகத்திடம் மத்தியசேனையில் இருந்து கவுண்டம்பட்டி வரை உள்ள சாலையை சீரமைக்க வேண்டும் என்றும், விருதுநகர் ஆத்துப்பாலம் அருகே உள்ள சிவகாசி சாலையை மேம்படுத்த வேண்டும் என்றும் கோரி மனு கொடுத்தனர். மேலும் ஆமத்தூரில் இருந்து மீசலூர் செல்லும் சாலையையும் சீரமைக்க கோரி இருந்தனர்.


கடந்த ஆண்டு ஜூன் மாதம் 3 மாதங்களுக்குள் சாலை சீரமைப்புகள் பணிகள் முடிக்கப்படும் என்று உறுதி அளித்துள்ள நெடுஞ்சாலைத்துறை அதிகாரிகள் ஓராண்டு ஆகியும் எவ்வித நடவடிக்கையும் எடுக்காமல் பாராமுகமாகவே உள்ளனர். மாவட்ட நிர்வாகத்திடம் இந்த பிரச்சினை குறித்து மனுக்கள் கொடுக்கப்பட்டும் எவ்வித நடவடிக்கையும் எடுக்கப்படவில்லை. இதனை தொடர்ந்து விருதுநகர் நெடுஞ்சாலைத்துறை கோட்ட என்ஜினீயர் கவுண்டம்பட்டி சாலையினை ஒருங்கிணைந்த சாலை உள்கட்டமைப்பு திட்டத்தின் கீழ் 27.9.2018 அன்று டெண்டர் கோரப்பட்டுள்ளது என்றும், விரைவில் பணி முடிக்கப்படும் என்றும் தெரிவித்துள்ளார். ஆனாலும் எவ்வித நடவடிக்கையும் எடுத்ததாக தெரியவில்லை.

இந்த நிலையில் வெல்லூர், கவுண்டம்பட்டி மற்றும் அப்பகுதியில் உள்ள கிராம மக்கள் பல முறை அதிகாரிகளிடம் சென்று மனுக்கள் கொடுத்தும் சாலை சீரமைப்பு பணிகள் மேற்கொள்ளப்படாததால் நெடுஞ்சாலைத்துறை அலுவலகம் முன்பு போராட்டம் நடத்த முடிவு செய்துள்ளதாக முருகேசன் தெரிவித்துள்ளார். அதிகாரிகள் மெத்தனம் காட்டும் நிலையில் மாவட்ட நிர்வாகமும் இந்த பிரச்சினையில் தலையிட்டு உரிய நடவடிக்கை எடுக்க வேண்டும் என்று கிராம மக்கள் வலியுறுத்தியுள்ளனர்.