திட்டச்சேரி-ப.கொந்தகை மெயின் சாலையில், குழாய் உடைந்து வீணாகும் குடிநீர் - அதிகாரிகள் கவனிப்பார்களா?

திட்டச்சேரி,

நாகை மாவட்டம் திட்டச்சேரியில் இருந்து ப.கொந்தகை மெயின் சாலை வழியாக கொள்ளிடம் கூட்டு குடிநீர் திட்டத்தின் கீழ் அமைக்கப்பட்ட குடிநீர் குழாய் செல்கிறது. இந்த குடிநீர் நாகூர், நாகை, வேளாங்கண்ணி, தலைஞாயிறு, வேதாரண்யம் உள்ளிட்ட பகுதிகளில் உள்ள பொதுமக்களுக்கு வினியோகம் செய்யப்படுகிறது.

இந்த நிலையில் கடந்த சில நாட்களாக 5-க்கும் மேற்பட்ட இடங்களில் குடிநீர் குழாயில் உடைப்பு ஏற்பட்டுள்ளது. இதனால் தண்ணீர் அதிகளவில் வெளியேறி சாலையில் தேங்கி நின்று வீணாகிறது. இந்த குழாய் உடைப்புகள் சரி செய்யப்படாமல் அப்படியே உள்ளது. கொள்ளிடம் கூட்டு குடிநீர் திட்டத்தின் மூலம் வழங்கப்படும் குடிநீரை பயன்படுத்தும் திட்டச்சேரி, ப.கொந்தகை பகுதிகளை சேர்ந்த 200-க்கும் மேற்பட்ட பொதுமக்களுக்கு குடிநீர் தட்டுப்பாடு ஏற்படும் நிலை உள்ளது.

மேலும் சாலையோரம் தண்ணீர் தேங்கி நிற்பதால், சாலையில் பள்ளம் ஏற்பட்டுள்ளது. இதனால் அந்த வழியாக செல்லும் வாகன ஓட்டிகள் அவதிப்படுகின்றனர். இதுகுறித்து சம்பந்தப்பட்ட துறையினரிடம் பலமுறை புகார் அளித்தும் இதுவரை எந்தவித நடவடிக்கையும் எடுக்கப்படவில்லை என பொதுமக்கள் வேதனை தெரிவிக்கின்றனர்.

எனவே, தற்போது கோடைக்காலம் என்பதால், சம்பந்தப்பட்ட அதிகாரிகள் திட்டச்சேரி - ப.கொந்தகை மெயின் சாலையில் உடைப்பு ஏற்பட்டுள்ள குடிநீர் குழாய்களை சீரமைக்க கவனம் செலுத்த வேண்டும் என அப்பகுதி பொதுமக்கள் கோரிக்கை விடுத்துள்ளனர்.