மாரண்டஅள்ளியில் கிணற்றில் கார் டிரைவர் பிணம் கொலையா? போலீசார் விசாரணை

பாலக்கோடு,

தர்மபுரி மாவட்டம் மாரண்டஅள்ளியில் பேரூராட்சிக்கு சொந்தமான 50 அடி ஆழ கிணறு உள்ளது. இதில் இருந்து மேல்நிலை நீர்த்தேக்க தொட்டிக்கு தண்ணீர் ஏற்றி அதில் இருந்து பொதுமக்களுக்கு தண்ணீர் வினியோகம் செய்யப்பட்டு வருகிறது. நேற்று காலை பேரூராட்சி ஊழியர் மணிகண்டன் அந்த கிணற்றிற்கு சென்று மின்மோட்டாரை இயக்கி விட்டு கிணற்றில் எவ்வளவு தண்ணீர் உள்ளது என எட்டி பார்த்தார். அப்போது கிணற்றில் ஆண் ஒருவர் பிணமாக மிதப்பது தெரியவந்தது.

இதனால் அதிர்ச்சி அடைந்த அவர் அக்கம் பக்கத்தினரிடம் தெரிவித்தார். அவர்கள் கிணற்றிற்கு திரண்டு வந்து பார்த்தனர். இதுகுறித்து பாலக்கோடு தீயணைப்பு நிலையத்திற்கும், மாரண்டஅள்ளி போலீஸ் நிலையத்திற்கும் தகவல் தெரிவித்தனர். இதையடுத்து தீயணைப்பு படைவீரர்கள் சம்பவ இடத்திற்கு விரைந்து சென்று கிணற்றில் இருந்து பிணத்தை மேலே கொண்டு வந்தனர். இதுகுறித்து தகவல் அறிந்து வந்த மாரண்டஅள்ளி போலீசார் இறந்தவரின் உடலை கைப்பற்றி விசாரணை நடத்தினர்.

அப்போது அவர் மாரண்டஅள்ளி அருகே உள்ள சி.எம்.புதூரை சேர்ந்த கார் டிரைவர் சண்முகம் (வயது 40) என்பதும், இவருக்கு திருமணமாகி மனைவி மற்றும் ஒரு மகனும், ஒரு மகளும் இருப்பது தெரியவந்தது. மாரண்டஅள்ளி செல்வதாக கூறி சென்றவர் கிணற்றில் பிணமாக கிடப்பது தெரியவந்தது. மேலும் இவருக்கு மது குடிக்கும் பழக்கம் இருப்பதும், கிணற்றுக்கு அருகில் மதுபாட்டில் இருப்பதும் தெரியவந்தது.

இதையடுத்து போலீசார் சண்முகத்தின் உடலை பிரேத பரிசோதனைக்காக தர்மபுரி அரசு ஆஸ்பத்திரிக்கு அனுப்பி வைத்தனர். மாரண்டஅள்ளி போலீசார் வழக்குப்பதிவு செய்து சண்முகம் கிணற்றில் மதுபோதையில் தவறி விழுந்து இறந்தாரா? அல்லது முன்விரோதம் காரணமாக யாராவது அவரை கொலை செய்து கிணற்றில் வீசி சென்றார்களா? என தீவிர விசாரணை நடத்தி வருகின்றனர்.