பாவூர்சத்திரத்தில் 2 வீடுகளில் நகை- பணம் திருட்டு

பாவூர்சத்திரம், 

நெல்லை மாவட்டம் பாவூர்சத்திரம் கே.டி.சி.நகரை சேர்ந்தவர் சரவணன் (வயது 33). இவர் பாவூர்சத்திரம் அருகே உள்ள நாகல்குளத்தில் பீடிக்கடை நடத்தி வருகிறார். நேற்று முன்தினம் இரவு சரவணன் தனது மனைவி பொன்மலருடன் பாவூர்சத்திரத்தில் உள்ள தாயார் வீட்டிற்கு சென்றார்.

நேற்று காலை 2 பேரும் மீண்டும் வீட்டுக்கு திரும்பி வந்தனர். அப்போது வீட்டின் கதவு உடைக்கப்பட்டு கிடந்ததை கண்டு அவர்கள் அதிர்ச்சி அடைந்தனர். உள்ளே சென்று பார்த்தபோது, பீரோ உடைக்கப்பட்டு அதில் இருந்த 2 பவுன் தங்க நகையையும், ரூ.2 ஆயிரத்தையும் மர்ம நபர்கள் திருடிச் சென்றுவிட்டது தெரியவந்தது.

இதேபோல் அதே பகுதியை சேர்ந்தவர் ஜேக்கப் சுந்தர்ராஜ் (வயது 44). இவர் சம்பவத்தன்று வெளியூர் சென்றுவிட்டார். நேற்று காலை அவரது வீடு திறந்து கிடப்பதாக அக்கம் பக்கத்தினர் அவருக்கு போன் மூலம் தகவல் தெரிவித்தனர். உடனே அவர் வீட்டிற்கு வந்தார். அப்போது வீட்டில் இருந்த 2 பீரோக்கள் உடைக்கப்பட்டிருந்தன. மேலும் மேஜையில் வைக்கப்பட்டிருந்த ரூ.600 திருடு போயிருந்தது தெரியவந்தது.

இந்த 2 சம்பவங்கள் குறித்தும் பாவூர்சத்திரம் போலீசில் புகார் செய்யப்பட்டது. அதன் பேரில் போலீசார் சம்பவ இடத்திற்கு சென்று பார்வையிட்டனர்.

இதுதொடர்பாக வழக்குப்பதிவு செய்து மர்ம நபர்களை வலைவீசி தேடி வருகின்றனர்.