மது குடித்ததை கண்டித்ததால் மனைவியை வெட்டி கொன்று டாக்சி டிரைவர் தற்கொலை புனேயில் பயங்கரம்

புனே, 

புனே சிஞ்ச்வாட் கிருஷ்ணாநகரை சேர்ந்தவர் ராஜேந்திர போஸ்லே (வயது50). டாக்சி டிரைவர். இவரது மனைவி சங்கீதா(47). இவர்களுக்கு 2 மகன்கள். மூத்த மகன் திருமணமாகி தனியாக வசித்து வருகிறார். இளைய மகன் தாய், தந்தையுடன் வசித்து வந்தார்.

ராஜேந்திர போஸ்லேவுக்கு குடிப்பழக்கம் இருந்து வந்தது. இது அவரது மனைவி சங்கீதாவுக்கு பிடிக்கவில்லை. அவர் கணவரை கண்டித்து வந்தார். இதனால் கணவர், மனைவி இருவருக்கும் இடையே அடிக்கடி தகராறு ஏற்பட்டு வந்தது.

சம்பவத்தன்று மது குடித்துவிட்டு ராஜேந்திர போஸ்லே வீட்டுக்கு வந்துள்ளார். இதை சங்கீதா கண்டித்து உள்ளார். இதனால் மீண்டும் அவர்களுக்குள் தகராறு ஏற்பட்டது. இந்த தகராறு முற்றியதில் கடும் ஆத்திரம் அடைந்த ராஜேந்திர போஸ்லே வீட்டில் இருந்த அரிவாளால் மனைவியை வெட்டிக்கொலை செய்தார். பின்னர் அவரும் வீட்டில் தூக்குப்போட்டு தற்கொலை செய்துகொண்டார்.

தகவல் அறிந்து வந்த போலீசார் கணவர், மனைவி இருவரது உடல்களையும் கைப்பற்றி பிரேத பரிசோதனைக்கு அருகில் உள்ள ஆஸ்பத்திரிக்கு அனுப்பி வைத்தனர்.

மேலும் சம்பவம் குறித்து போலீசார் வழக்குப்பதிவு செய்து விசாரணை நடத்தி வருகின்றனர்.