திசையன்விளையில் 2 கடைகளில் பணம் திருட்டு

திசையன்விளை, 

நெல்லை மாவட்டம் திசையன்விளை மடத்து அச்சம்பாடு பகுதியைச் சேர்ந்தவர் பிலிப் போஸ் டேனியல் (வயது 65). இவர் திசையன்விளை முன்னாள் நகர பஞ்சாயத்து துணை தலைவராக இருந்தார். இவர் திசையன்விளை மெயின் பஜாரில் மளிகை கடை நடத்தி வருகிறார். இவர் நேற்று முன்தினம் இரவில் வழக்கம்போல் தனது கடையை பூட்டிச் சென்றார்.

பின்னர் நள்ளிரவில் அங்கு வந்த மர்மநபர்கள், பிலிப் போஸ் டேனியலின் கடையின் மேற்கூரை இரும்பு தகடுகளை பிரித்து உள்ளே நுழைந்தனர். பின்னர் கடையில் இருந்த மேஜையை உடைத்து திறந்து, அதில் இருந்த ரூ.11 ஆயிரத்தை திருடிச் சென்றனர். நேற்று காலையில் பிலிப் போஸ் டேனியல் தனது கடைக்கு சென்றபோது, கடையின் மேற்கூரை பிரிக்கப்பட்டு, மேஜையில் இருந்த பணம் திருடு போனதை அறிந்து அதிர்ச்சி அடைந்தார்.

திசையன்விளை அருகே உவரியைச் சேர்ந்தவர் செல்வகுமார் (45). இவரும் திசையன்விளை மெயின் பஜாரில் மளிகை கடை நடத்தி வருகிறார். நேற்று முன்தினம் இரவில் இவரது கடையின் மேற்கூரை ஆஸ்பெஸ்டாஸ் ஓடுகளை மர்மநபர்கள் பிரித்து உள்ளே நுழைந்தனர். பின்னர் கடையில் இருந்த மேஜையை உடைத்து திறந்து, அதில் இருந்த ரூ.10 ஆயிரத்தை மர்மநபர்கள் திருடிச் சென்றனர்.

நேற்று காலையில் செல்வகுமார் தனது கடைக்கு சென்றபோது, கடையின் மேற்கூரை ஓடுகள் பிரிக்கப்பட்டு, கடையில் இருந்த பணம் திருடு போனதை அறிந்து அதிர்ச்சி அடைந்தார். இதுகுறித்த புகார்களின்பேரில், திசையன்விளை போலீசார் வழக்குப்பதிவு செய்து விசாரணை நடத்தி வருகின்றனர்.

திருட்டு நடந்த செல்வகுமாரின் மளிகை கடையில் உள்ள கண்காணிப்பு கேமராவில் பதிவான காட்சியில், 30 வயது மதிக்கத்தக்க வாலிபர் ஒருவர் நள்ளிரவில் கடையில் புகுந்து திருடியது பதிவாகி இருந்தது. அதன் மூலம் போலீசார் துப்பு துலக்கி தீவிர விசாரணை நடத்தி வருகின்றனர். திசையன்விளையில் ஒரே நாள் இரவில் 2 கடைகளில் நடந்த திருட்டு சம்பவம் பரபரப்பை ஏற்படுத்தியது.