கூத்தாநல்லூர் அருகே முன்விரோதத்தில் தந்தை-மகன் மீது தாக்குதல் தொழிலாளி கைது; 3 பேருக்கு வலைவீச்சு

கூத்தாநல்லூர், 

திருவாரூர் மாவட்டம் கூத்தாநல்லூர் அருகே உள்ள கோரையாறு வடக்கு தெருவை சேர்ந்தவர் இளமாறன் (வயது 29). இவருக்கும், கோரையாறு நடுத்தெருவை சேர்ந்த ராஜா (25) என்பவருக்கும் இடையே முன்விரோதம் இருந்து வந்துள்ளது. இந்த நிலையில் சம்பவத்தன்று இளமாறன் கோரையாறு பாலத்தில் நின்று கொண்டிருந்தார்.

அப்போது அங்கு வந்த ராஜா மற்றும் அவருடைய நண்பர்கள் நெடுஞ்செழியன்(45), அருள்தாஸ், ராகுல் ஆகிய 4 பேரும் சேர்ந்து, இளமாறனிடம் தகராறு செய்துள்ளனர். இதனை இளமாறனும், அவருடைய தந்தை பன்னீர்செல்வமும் தட்டி கேட்டனர். இதனால் ஆத்திரமடைந்த 4 பேரும் சேர்ந்து, இளமாறனையும், பன்னீர்செல்வத்தையும் தாக்கி விட்டு தப்பியோடி விட்டனர்.

இதில் படுகாயம் அடைந்த 2 பேரும் மன்னார்குடி அரசு மருத்துவமனையில் சிகிச்சை பெற்று வருகின்றனர். இதுகுறித்து இளமாறன் கூத்தாநல்லூர் போலீசில் புகார் கொடுத்தார். அதன்பேரில் போலீசார் வழக்குப்பதிவு செய்து கூலித் தொழிலாளியான நெடுஞ்செழியனை கைது செய்தனர். மேலும் தலைமறைவாக உள்ள ராஜா, அருள்தாஸ், ராகுல் ஆகிய 3 பேரையும் வலைவீசி தேடி வருகின்றனர்.