திருமணத்துக்கு மறுத்ததால் கொல்ல முயற்சி இளம்பெண் இறந்து விட்டதாக கருதி வாலிபர் தூக்குப்போட்டு சாவு

புனே, 

திருமணத்துக்கு மறுத்த இளம்பெண்ணை கழுத்தை இறுக்கிய போது, அப்பெண் இறந்து விட்டதாக கருதி வாலிபர் தூக்குப்போட்டு தற்கொலை செய்துகொண்டார்.

ஒருதலை காதல்

புனே அம்பேகாவ் புத்ருக் சதாசிவ் தாங்கட் நகரை சேர்ந்தவர் ராஜாராம் புட்கர்(வயது28). இவர் அந்த பகுதியை சேர்ந்த 23 வயது இளம்பெண்ணை ஒரு தலையாக காதலித்து வந்து உள்ளார்.

நன்கு பேசி பழகி வந்ததால் தனது காதலை வெளிப்படுத்தினால் அவர் தன்னை திருமணம் செய்துகொள்ள சம்மதித்து விடுவார் என நம்பிக்கையுடன் இருந்தார்.

இதற்காக சம்பவத்தன்று அந்த இளம்பெண்ணை தனது வீட்டுக்கு அழைத்து, தனது காதலை கூறி திருமணத்துக்கு சம்மதம் கேட்டார்.

வாலிபர் தற்கொலை

இதை சற்றும் எதிர்பாராத அந்த பெண் அதிர்ச்சி அடைந்தார். மேலும் அவரை திருமணம் செய்ய மறுத்துவிட்டார். இதனால் மிகுந்த ஏமாற்றத்துக்குள்ளான ராஜாராம் புட்கர் இளம்பெண் மீது கடும் கோபம் அடைந்தார். வீட்டில் இருந்த நைலான் கயிறை எடுத்து இளம்பெண்ணின் கழுத்தை நெரித்தார். இதில் அந்த இளம்பெண் மயங்கி விழுந்தார். அவர் இறந்து விட்டதாக பயந்து போன ராஜாராம் புட்கர் தனது வீட்டில் தூக்குப்போட்டு கொண்டார்.

இதைப்பார்த்து அதிர்ச்சி அடைந்த அக்கம்பக்கத்தினர் போலீசுக்கு தகவல் கொடுத்தனர். போலீசார் சம்பவ இடத்துக்கு வந்து இருவரையும் மீட்டு சிகிச்சைக்காக அருகில் உள்ள ஆஸ்பத்திரியில் சேர்த்தனர். அங்கு டாக்டர்கள் பரிசோதனையில் ராஜாராம் புட்கர் இறந்துவிட்டதாக தெரிவித்தனர். இளம்பெண் தீவிர சிகிச்சை பிரிவில் அனுமதிக்கப்பட்டார்.

இந்த சம்பவம் தொடர்பாக போலீசார் வழக்குப்பதிவு செய்து விசாரணை நடத்தி வருகின்றனர்.