‘கல்லூரி மாணவியை கடத்துவேன்’ என மிரட்டிய ரவுடி வெட்டிக்கொலை மாணவியின் சகோதரர் கைது

பட்டுக்கோட்டை,

தஞ்சாவூர் மாவட்டம், பட்டுக்கோட்டை அருகே உள்ள ஆலம்பள்ளம் தெற்குத்தெருவை சேர்ந்தவர் ராஜேந்திரன். இவருடைய மகன் பெரமநாதன் (வயது27). இவர் மீது பட்டுக்கோட்டை நகரம், தாலுகா ஆகிய போலீஸ் நிலையங்களில் பல்வேறு குற்ற வழக்குகள் நிலுவையில் உள்ளன. பெரமநாதன் அதே பகுதியை சேர்ந்த ஒரு கல்லூரி மாணவியிடம் தன்னை திருமணம் செய்து கொள்ளுமாறு கூறி மாணவிக்கு தொல்லை கொடுத்து வந்ததாக கூறப்படுகிறது. இதை அறிந்த மாணவியின் தந்தை மோகன், பெரமநாதனை கண்டித்தார். ஆனால் பெரமநாதன் இதை கேட்காமல் ‘கல்லூரி மாணவியை கடத்தி திருமணம் செய்வேன்’ என கூறி மாணவியின் தந்தை மோகனுக்கு மிரட்டல் விடுத்ததாக தெரிகிறது.

இதனால் ஆத்திரமடைந்த மோகன் மற்றும் அவரது மகன்கள் பெரமநாதனை கொலை செய்ய திட்டமிட்டனர்.

நேற்றுமுன்தினம் இரவு 8.30 மணியளவில் அதே ஊரைச்சேர்ந்த வினோத் என்பவர் ஏற்கனவே திட்டமிட்டபடி பெரமநாதனை தனியாக ஆலம்பள்ளம் தெற்குதெருவுக்கு அழைத்து வந்து பேசிக்கொண்டிருந்தார். அப்போது அங்கு வந்த மோகன், அவருடைய மகன்கள் ராஜா, ராம்பிரகாஷ், உறவினர் சக்திவேலு ஆகியோர் திடீரென பெரமநாதனை சூழ்ந்து கொண்டு சரமாரியாக அரிவாளால் வெட்டினர். இதில் படுகாயம் அடைந்த அவர் ரத்தவெள்ளத்தில் சம்பவ இடத்திலேயே பரிதாபமாக இறந்தார். உடனே சம்பவ இடத்தில் இருந்து கொலையாளிகள் தப்பி சென்று விட்டனர். இது குறித்து பெரமநாதனின் தாய் தமிழ்ச்செல்வி பட்டுக்கோட்டை தாலுகா போலீசில் புகார் கொடுத்தார். அதன் பேரில் போலீசார் சம்பவ இடத்துக்கு விரைந்து சென்று உடலை கைப்பற்றி பட்டுக்கோட்டை அரசு மருத்துவமனைக்கு பிரேத பரிசோதனைக்கு அனுப்பி வைத்தனர்.

இந்தநிலையில் மோகன் மகன் ராம்பிரகாஷ்(27) அரிவாளுடன் பட்டுக்கோட்டை தாலுகா போலீசில் சரண் அடைந்தார். அவரை போலீசார் கைது செய்தனர். மேலும் இந்த கொலை வழக்கில் தொடர்புடைய மோகன், அவரது மற்றொரு மகன் ராஜா, உறவினர்கள் சக்திவேலு, வினோத் ஆகிய 4 பேரை போலீசார் வலைவீசி தேடி வருகின்றனர். கல்லூரி மாணவியை கடத்தி திருமணம் செய்யபோவதாக மிரட்டல் விடுத்த ரவுடி வெட்டிக்கொலை செய்யப்பட்ட சம்பவம் அப்பகுதியில் பரபரப்பை ஏற்படுத்தியுள்ளது.