சின்னசேலம் அருகே ரெயில் மோதி பெயிண்டர் பலி

சின்னசேலம், 

சின்னசேலம் அருகே உள்ள சிலுவத்தூர் எம்.ஜி.ஆர். நகரை சேர்ந்தவர் நடேசன் மகன் வேல்முருகன்(வயது 35), பெயிண்டர். இவருக்கு நல்லம்மாள்(30) என்ற மனைவியும், 4 குழந்தைகளும் உள்ளனர்.

வேல்முருகன் நேற்று அதிகாலை இயற்கை உபாதை கழிப்பதற்காக வீட்டின் அருகே உள்ள ரெயில் தண்டவாளத்தை கடக்க முயன்றார். அப்போது அந்த வழியாக சென்னையில் இருந்து சேலம் நோக்கி சென்ற எக்ஸ்பிரஸ் ரெயில் வேல்முருகன் மீது மோதியது. இதில் பலத்த காயமடைந்த அவர் சம்பவ இடத்திலேயே உடல் சிதறி பலியானார். இதைபார்த்த அந்த வழியாக சென்றவர்கள் வேல்முருகன் குடும்பத்தினருக்கு தகவல் தெரிவித்தனர். இதனால் பதறிய குடும்பத்தினர், உறவினர்கள் சம்பவ இடத்துக்கு வந்து ரத்த வெள்ளத்தில் பிணமாக கிடந்த வேல்முருகனின் உடலை பார்த்து கதறி அழுதனர்.

மேலும் இந்த சம்பவம் குறித்து சேலம் ரெயில்வே போலீஸ் நிலையத்துக்கு தகவல் தெரிவிக்கப்பட்டது. அதன்பேரில் போலீசார் சம்பவ இடத்துக்கு விரைந்து வந்து ரெயில் மோதியதில் பலியான வேல்முருகனின் உடலை கைப்பற்றி பிரேத பரிசோதனைக்காக சேலம் அரசு மருத்துவமனைக்கு அனுப்பி வைத்தனர். இதுகுறித்த புகாரின்பேரில் ரெயில்வே போலீசார் வழக்குப்பதிவு செய்து விசாரணை நடத்தி வருகின்றனர்.