பிளஸ்-2 அசல் மதிப்பெண் சான்றிதழ் வினியோகம்: பள்ளிகளில் இருந்தே வேலைவாய்ப்பு அலுவலக பதிவுக்கு ஏற்பாடு

நாமக்கல், 

நாமக்கல் மாவட்டத்தில் நேற்று பிளஸ்-2 மாணவர்களுக்கு அசல் மதிப்பெண் சான்றிதழ் அந்தந்த பள்ளிகளில் வழங்கப்பட்டது. பள்ளிகளில் இருந்தே ஆன்-லைனில் வேலைவாய்ப்பு அலுவலக பதிவுக்கும் ஏற்பாடு செய்யப்பட்டு இருந்தது.

இது குறித்து கலெக்டர் ஆசியா மரியம் வெளியிட்டுள்ள செய்திக்குறிப்பில் கூறியிருப்பதாவது:-

பிளஸ்-2 தேர்ச்சி பெற்ற மாணவர்களுக்கு மதிப்பெண் சான்று வழங்கப்படும் பள்ளிகளிலேயே வேலைவாய்ப்பு அலுவலக பதிவுப்பணி நடைபெற நடவடிக்கை மேற்கொள்ளப்பட்டு உள்ளது. எனவே பிளஸ்-2 தேர்ச்சி பெற்ற மாணவர்கள் தங்களது எஸ்.எஸ்.எல்.சி. கல்வித் தகுதியினை பதிவு செய்த வேலைவாய்ப்பு அலுவலக அடையாள அட்டை எண், ஆதார் அட்டை எண், ரே‌‌ஷன்கார்டு, செல்போன் எண், மின்னஞ்சல் முகவரி ஆகிய விவரங்களை எடுத்துவர வேண்டும்.

எஸ்.எஸ்.எல்.சி. கல்வித் தகுதியினை பதிவு செய்தவர்கள் வேலைவாய்ப்பு அலுவலக பதிவு எண் தெரியவில்லை எனில் வேலைவாய்ப்பு அலுவலகத்தை அணுகி பெற்றுக்கொள்ள வேண்டும்.

வருகிற 17-ந் தேதி வரை வேலைவாய்ப்பு பதிவுப்பணி அந்தந்த பள்ளிகளிலேயே நடைபெறும். பதிவுப்பணி நடைபெறும் 15 நாட்களுக்கும் மதிப்பெண் சான்று வழங்க தொடங்கிய முதல் நாளே பதிவு மூப்பு தேதியாக எடுத்து கொள்ளப்படும். பிளஸ்-2 தேர்ச்சி பெற்று வேலைவாய்ப்புக்கு பதிவு செய்ய விரும்பும் அனைத்து மாணவர்களும் தவறாது இந்த வசதியை பயன்படுத்தி கொள்ளலாம்.

இவ்வாறு அதில் கூறப்பட்டு உள்ளது.