எட்டயபுரத்தில் இளம்பெண் வெட்டிக்கொலை கணவருக்கு போலீஸ் வலைவீச்சு

எட்டயபுரம், 

இதுகுறித்து போலீஸ்தரப்பில் கூறப்பட்டதாவது:-

தூத்துக்குடி மாவட்டம் எட்டயபுரம் நடுவிர்பட்டி தெற்கு ஆறுமுகமுதலியார் தெருவை சேர்ந்தவர் கருப்பசாமி (வயது 35). இவருடைய மனைவி முனீசுவரி (32). இவர்களுக்கு முகேஷ் (11) என்ற மகனும், மஞ்சு (9) என்ற மகளும் உள்ளனர்.

கருப்பசாமி கோவில்பட்டியில் உள்ள ஒரு கோழிக்கடையில் தொழிலாளியாக வேலை பார்த்து வருகிறார். இவர் தினமும் காலையில் வேலைக்கு சென்று விட்டு மாலையில் தான் வீட்டுக்கு வருவாராம். மேலும் கருப்பசாமிக்கு குடிப்பழக்கம் இருந்ததாக கூறப்படுகிறது. இதனால் அவர் சம்பாதிக்கும் பணத்தை வீட்டு செலவுக்கு கொடுக்காமல் இருந்து வந்துள்ளார். இதன் காரணமாக கணவன்-மனைவிக்கு இடையே அடிக்கடி தகராறு நடந்தது.

இந்த நிலையில் நேற்று மாலையில் கருப்பசாமி வீட்டுக்கு வந்தார். அந்த நேரம் பிள்ளைகள் விளையாடுவதற்காக வெளியே சென்று விட்டனர். வீட்டில் முனீசுவரி மட்டும் இருந்தார். அப்போது அவர்கள் 2 பேருக்கும் இடையே வழக்கம் போல் மீண்டும் தகராறு ஏற்பட்டது. ஒரு கட்டத்தில் தகராறு முற்றி ஒருவரையொருவர் தாக்கிக்கொண்டனர்.

இதில் ஆத்திரம் அடைந்த கருப்பசாமி வீட்டில் இருந்த அரிவாளால் தனது மனைவி முனீசுவரியை சரமாரியாக வெட்டினார். இதில் உடலில் பல்வேறு இடங்களில் வெட்டுக்காயம் அடைந்த அவர் சம்பவ இடத்திலேயே ரத்த வெள்ளத்தில் துடிதுடித்து இறந்தார். பின்னர் அங்கிருந்து கருப்பசாமி தப்பிச் சென்று விட்டார்.

இதுகுறித்து தகவல் அறிந்த விளாத்திகுளம் துணை போலீஸ் சூப்பிரண்டு ஜெயக்குமார், எட்டயபுரம் போலீஸ் இன்ஸ்பெக்டர் வனசுந்தர் மற்றும் போலீசார் சம்பவ இடத்துக்கு சென்றனர். அவர்கள் முனீசுவரியின் உடலை கைப்பற்றி பிரேத பரிசோதனைக்காக எட்டயபுரம் அரசு ஆஸ்பத்திரிக்கு அனுப்பி வைத்தனர். இதுதொடர்பாக எட்டயபுரம் போலீசார் வழக்குப்பதிவு செய்து தப்பி ஓடிய கருப்பசாமியை வலைவீசி தேடி வருகின்றனர்.

எட்டயபுரத்தில் இளம்பெண்ணை கணவரே வெட்டிக் கொலை செய்த சம்பவம் அந்த பகுதியில் பரபரப்பை ஏற்படுத்தி உள்ளது.