மராட்டிய சட்டசபை தேர்தல் குறித்து தேசியவாத காங்கிரஸ் ஆலோசனை : காங்கிரசிடம் 144 தொகுதிகளை கேட்க முடிவு

மும்பை,

மராட்டிய சட்டசபை தேர்தல் வருகிற அக்டோபர் மாத வாக்கில் நடைபெறும் என்று எதிர்பார்க்கப்படுகிறது.

இந்த தேர்தலை எதிர்கொள்ள ஆளும் கூட்டணி கட்சிகளான பா.ஜனதா, சிவசேனா ஒரு அணியாகவும், காங்கிரஸ், தேசியவாத காங்கிரஸ் கூட்டணி கட்சிகள் மற்றொரு அணியாகவும் ஆயத்தமாகி வருகின்றன.

மராட்டிய சட்டசபைக்கு மொத்தம் 288 தொகுதிகள் உள்ள நிலையில், பா.ஜனதா- சிவசேனா கட்சிகள் தலா 135 தொகுதிகளில் போட்டியிடும் என்றும், எஞ்சிய தொகுதிகள் சிறிய கட்சிகளுக்கு ஒதுக்கப்படும் என்றும் பா.ஜனதா மந்திரி சந்திரகாந்த் பாட்டீல் தெரிவித்தார். கூட்டணி வெற்றி பெற்றால் முதல்-மந்திரி பதவி மீண்டும் பா.ஜனதாவுக்கு தான் வழங்கப்படும் என்று பா.ஜனதாவை சேர்ந்த மற்றொரு மந்திரி சுதீர் முங்கண்டிவார் கூறினார்.

பா.ஜனதா மந்திரிகளின் இந்த கருத்துக்கு சிவசேனா கடும் எதிர்ப்பு தெரிவித்து உள்ளது.

காங்கிரஸ், தேசியவாத காங்கிரஸ் கூட்டணியிலும் எந்த கட்சிக்கு எத்தனை தொகுதிகள் என்பது முடிவாகவில்லை. இந்த நிலையில தேசியவாத காங்கிரஸ் கட்சியின் கொங்கன் மண்டல நிர்வாகிகள் ஆலோசனை கூட்டம் நேற்று மும்பையில் நடந்தது. இதற்கு கட்சியின் நிறுவன தலைவர் சரத்பவார் தலைமை தாங்கினார்.

இதில் மும்பை, தானே உள்ளிட்ட கொங்கன் பகுதிக்கு உட்பட்ட மாவட்ட நிர்வாகிகள் கலந்து கொண்டனர்.

இந்த கூட்டத்தில் காங்கிரசுடன் சேர்ந்து தேர்தலை முழு பலத்துடன் சந்திப்பது என்று முடிவு எடுக்கப்பட்டது. பா.ஜனதா, சிவசேனா கூட்டணியை வீழ்த்துவது குறித்தும் ஆலோசிக்கப்பட்டது.

ஆலோசனையின் போது, தேசியவாத காங்கிரசுக்கு சரிபாதியாக 144 தொகுதிகள் ஒதுக்கப்பட வேண்டும் என்றும், இது தொடர்பாக காங்கிரசிடம் வலியுறுத்த வேண்டும் என்றும் கட்சி நிர்வாகிகள் பேசினர்.

தற்போது தேசியவாத காங்கிரசுக்கு 41 எம்.எல்.ஏ.க்கள் உள்ளனர். கடந்த தேர்தலில் 18 முதல் 20 வேட்பாளர்கள் 5 ஆயிரத்துக்கும் குறைவான வாக்கு வித்தியாசத்தில் தோல்வியை தழுவினர். இதனால் நம்மிடம் தற்போது 60 முதல் 65 வெற்றி வேட்பாளர்கள் இருப்பதால், நிச்சயம் சரிபாதி தொகுதிகளில் தேசியவாத காங்கிரஸ் போட்டியிட வேண்டும் என்று நிர்வாகிகள் வலியுறுத்தினர்.

மேலும் மும்பையில் 36 தொகுதிகள் உள்ளன. வழக்கமாக மும்பையில் காங்கிரஸ் அதிக தொகுதிகளிலும், தேசியவாத காங்கிரஸ் குறைவான தொகுதிகளிலும் போட்டியிடும். ஆனால், இந்த தடவை மும்பையில் உள்ள தொகுதிகளிலும் சரிபாதியாக, அதாவது 18 தொகுதிகளில் தேசியவாத காங்கிரஸ் போட்டியிட வேண்டும் என்று கட்சி நிர்வாகிகள் சரத்பவாரை வலியுறுத்தினர்.

மராட்டிய சட்டசபையை பொறுத்தவரை காங்கிரஸ், தேசியவாத காங்கிரஸ் கட்சிகள் தொடர்ந்து 15 ஆண்டு காலம் கூட்டணி ஆட்சி செய்து வந்த நிலையில், கடந்த 2014 தேர்தலில் தனித்து போட்டியிட்டு ஆட்சியை பா.ஜனதா, சிவசேனாவிடம் பறி கொடுத்தது குறிப்பிடத்தக்கது.