<
12-வது மாடியில் இருந்து குதித்து பிசியோதெரபி மாணவர் தற்கொலை காரணம் என்ன? போலீஸ் விசாரணை
12-வது மாடியில் இருந்து குதித்து பிசியோதெரபி மாணவர் தற்கொலை செய்துகொண்டார். அவரது தற்கொலைக்கான காரணம் குறித்து போலீசார் விசாரணை மேற்கொண்டு வருகின்றனர்.
மும்பை,
மும்பை தாதர் சிவாஜி பார்க் பகுதியை சேர்ந்தவர் மகேஷ் தாக்குர் (வயது58). மாநகராட்சி என்ஜினீயர். இவர் அங்குள்ள 12 மாடி கட்டிடம் ஒன்றில் வசித்து வருகிறார். இவரது மகன் ஓம்கார் தாக்குர் (21). இவர் கே.இ.எம். ஆஸ்பத்திரியில் உள்ள பிசியோதெரபி கல்லூரியில் 4-ம் ஆண்டு படித்து வந்தார். தற்போது அவருக்கு இறுதி தேர்வுகள் நடந்து வருகிறது.
நேற்றுமுன்தினம் இரவு இந்தியா- பாகிஸ்தான் அணிகள் மோதிய உலக கோப்பை கிரிக்கெட் போட்டியை இரவு 11 மணி வரை டி.வி.யில் பார்த்து கொண்டு இருந்தார்.
பின்னர் அதிகாலை 4 மணிக்கு எழுந்திருந்து தேர்வுக்கு படிக்க வேண்டும் என தந்தை மகேஷ் தாக்குரிடம் கூறிவிட்டு தனது அறைக்கு சென்று தூங்கினார். அதிகாலை தூக்கத்தில் இருந்து எழுந்த ஓம்கார் தாக்குர் திடீரென கட்டிடத்தின் மொட்டை மாடிக்கு சென்று கீழே குதித்துவிட்டார்.
சத்தம்கேட்டு ஓடிவந்த கட்டிட காவலாளி, ஓம்கார் தாக்குர் ரத்த வெள்ளத்தில் கிடப்பதை பார்த்து அதிர்ச்சி அடைந்தார். உடனடியாக சிவாஜி பார்க் போலீசுக்கு தகவல் கொடுத்தார். போலீசார் சம்பவ இடத்துக்கு விரைந்து வந்து ஓம்கார் தாக்குரை மீட்டு சயான் ஆஸ்பத்திரியில் சேர்த்தனர்.
அங்கு டாக்டர்கள் பரிசோதித்து விட்டு அவர் இறந்து விட்டதாக தெரிவித்தனர்.
இதையடுத்து போலீசார் அவரது உடலை பிரேத பரிசோதனைக்கு அனுப்பி வைத்தனர். இதற்கிடையே மகேஷ் தாக்குர் மகனை காணாமல் வீட்டில் தேடினார். அப்போது விசாரணை நடத்துவதற்காக மகேஷ் தாக்குரின் வீட்டுக்கு போலீசார் வந்தனர்.
அப்போது, தான் ஓம்கார் தாக்குர் கட்டிடத்தில் இருந்து குதித்து தற்கொலை செய்து கொண்டது அவரது பெற்றோருக்கு தெரியவந்தது. இதைக்கேட்டு அவர்கள் அதிர்ச்சியில் உறைந்தனர்.
ஓம்கார் தாக்குர் நேற்று நடக்க இருந்த கார்டியோ தேர்வுக்கு சரியான முறையில் தயாராகாமல் இருந்ததாகவும், இதுபற்றி அவர் தந்தையிடம் கூறி வேதனை அடைந்ததாகவும் கூறப்படுகிறது.
இதனால் ஏற்பட்ட விரக்தியில் அவர் தற்கொலை செய்து கொண்டு இருக்கலாம் என போலீசார் சந்தேகிக்கின்றனர். இருப்பினும் அவரது தற்கொலைக்கான காரணம் குறித்து போலீசார் வழக்குப்பதிவு செய்து விசாரணை நடத்தி வருகின்றனர்.
Related Tags :
Next Story
"Daily Thanthi" a prestigious product from The Thanthi Trust
எங்களைப்பற்றி தனித்தன்மை பாதுகாப்பு தொடர்புகொள்ள வலைத்தள தொகுப்பு ஆலோசனைகள் வேலைவாய்ப்பு
Paper Ad Tariff Web Ad Tariff Terms & Conditions (E-paper)
காப்புரிமை 2024, © The Thanthi Trust Powered by Hocalwire
