பெண்ணாடம் அருகே, கார் மோதி மாணவன் பலி

பெண்ணாடம்,

பெண்ணாடம் அருகே உள்ள சின்னகொசப்பள்ளத்தை சேர்ந்தவர் ரமேஷ். விவசாயி. இவரது மகன் விக்னேஷ்(வயது 11). இவன், அதே பகுதியில் உள்ள ஒரு பள்ளிக்கூடத்தில் 5-ம் வகுப்பு படித்து முடித்தான். பின்னர் 6-ம் வகுப்பு பயிலுவதற்காக இறையூரில் உள்ள ஒரு தனியார் பள்ளிக்கூடத்தில் சேர்க்கைக்காக விண்ணப்பித்திருந்தான். இந்த நிலையில் நேற்று காலையில் விக்னேஷ், தனது வீட்டின் முன்புள்ள விருத்தாசலம்-திட்டக்குடி சாலையை கடக்க முயன்றான். அப்போது விருத்தாசலத்தில் இருந்து திட்டக்குடி நோக்கி வேகமாக வந்த கார், விக்னேஷ் மீது மோதியது. இதில் தூக்கி வீசப்பட்ட அவன், ரத்த வெள்ளத்தில் மயங்கினான்.

உடனடியாக விக்னேசை பெற்றோர் மற்றும் உறவினர்கள் மீட்டு சிகிச்சைக்காக திட்டக்குடி அரசு மருத்துவ மனைக்கு கொண்டு சென்றனர். அங்கு அவனை பரிசோதனை செய்த டாக்டர்கள், ஏற்கனவே விக்னேஷ் இறந்து விட்டதாக கூறினர். இதை கேட்டதும் அவனது பெற்றோர் கதறி அழுதனர்.

இதனிடையே விபத்து பற்றி தகவல் அறிந்ததும் பெண்ணாடம் போலீசார் திட்டக்குடி அரசு மருத்துவமனைக்கு விரைந்து வந்து, விக்னேசின் உடலை கைப்பற்றி பிரேத பரிசோதனைக்காக அங்குள்ள பிணவறையில் வைத்தனர். இது குறித்த புகாரின் பேரில் போலீசார் வழக்குப்பதிவு செய்து விசாரணை நடத்தி வருகின்றனர்.