தொழிலாளி சாவில் திடீர் திருப்பம்: தற்கொலைக்கு தூண்டியதாக மனைவி- மாமனார் கைது

சிவகிரி, 

பெருந்துறை காந்தி நகரை சேர்ந்தவர் வெங்கடாச்சலம். இவருடைய மனைவி ராதா. இவர்களுடைய மகன் பாபு என்கிற பிரகாஷ் (29). கட்டிட தொழிலாளி. இவருக்கும், சிவகிரி அருகே உள்ள தாண்டாம்பாளையத்தை சேர்ந்த மகாலிங்கம் என்பவரின் மகள் பிரபா (22) என்பவருக்கும் கடந்த 4 ஆண்டுகளுக்கு முன்பு திருமணம் நடந்தது. இவர்களுக்கு 3 வயதில் பெண் குழந்தை உள்ளது. பாபு தன்னுடைய மனைவி மற்றும் குழந்தையுடன் சிவகிரி தாண்டாம்பாளையம் பகுதியில் வாடகை வீட்டில் வசித்து வந்தார். பாபுவுக்கு குடிப்பழக்கம் உண்டு.

இதனால் பாபுவுக்கும், பிரபாவுக்கும் இடையே அடிக்கடி தகராறு ஏற்பட்டது. இந்த நிலையில் சம்பவத்தன்று பாபு வீட்டின் விட்டத்தில் தூக்கில் தொங்கிய நிலையில் பிணமாக கிடந்தார். இதனை கவனித்த அக்கம் பக்கத்தினர் இதுபற்றி சிவகிரி போலீசாருக்கு தகவல் கொடுத்தனர். அதன்பேரில் போலீசார் சம்பவ இடத்துக்கு விரைந்து சென்று, பாபுவின் உடலை கைப்பற்றி பிரேத பரிசோதனைக்காக ஈரோடு அரசு ஆஸ்பத்திரிக்கு அனுப்பி வைத்தனர்.

பிரேத பரிசோதனைக்கு பின்னர் பாவுவின் உடலை வாங்க மறுத்ததோடு, அவரின் சாவில் மர்மம் இருப்பதாக கூறி பாபுவின் உறவினர்கள் ஈரோடு அரசு ஆஸ்பத்திரி அருகே போராட்டத்தில் ஈடுபட்டனர். இதுபற்றி தகவல் அறிந்ததும் ஈரோடு போலீசார் சம்பவ இடத்துக்கு விரைந்து சென்று, போராட்டத்தில் ஈடுபட்டவர்களுடன் பேச்சுவார்த்தை நடத்தினார்கள். பேச்சுவார்த்தையில் சமரசம் ஏற்பட்டதை தொடர்ந்து பொதுமக்கள் போராட்டத்தை கைவிட்டு அங்கிருந்து கலைந்து சென்றனர். இந்த நிலையில் தன்னுடைய மகனின் சாவுக்கு காரணமானவர்கள் மீது நடவடிக்கை எடுக்க வேண்டும் என்று சிவகிரி போலீசில், பாபுவின் தாய் ராதா புகார் கொடுத்தார். இதைத் தொடர்ந்து இந்த வழக்கில் திடீர் திருப்பம் ஏற்பட்டது. இது பற்றி போலீசார் வழக்குப்பதிவு செய்து, பாபுவை தற்கொலைக்கு தூண்டியதாக அவருடைய மனைவி பிரபா மற்றும் மாமனார் மகாலிங்கம் ஆகிய 2 பேரையும் கைது செய்தனர்.