வேப்பந்தட்டை அருகே, விலையில்லா மடிக்கணினி கேட்டு மாணவர்கள் சாலை மறியல் - போக்குவரத்து பாதிப்பு

வேப்பந்தட்டை,

பெரம்பலூர் மாவட்டம், வேப்பந்தட்டையை அடுத்துள்ள கை.களத்தூர் அரசு மேல்நிலைப்பள்ளியில் கடந்த 2017-18-ம் கல்வியாண்டில் 12-ம் வகுப்பில் 129 மாணவ- மாணவிகள் கல்வி பயின்றார்கள். அவர்களுக்கு தமிழக அரசின் விலையில்லா மடிக்கணினி இதுவரை வழங்கப்படவில்லை. இதுதொடர்பாக மாணவ- மாணவிகள் பள்ளி தலைமை ஆசிரியரை பலமுறை தொடர்பு கொண்டு, கேட்டும் கிடைக்கவில்லை. இதனால் ஆத்திரமடைந்த மாணவ- மாணவிகள் நேற்று காலை பள்ளி முன்பாக பெரம்பலூர்- சின்னசேலம் சாலையில் திடீர் சாலை மறியலில் ஈடுபட்டனர்.

அப்போது விலையில்லா மடிக்கணினி கேட்டு மாணவர்கள் கோஷமிட்டனர். இதுகுறித்து தகவல் அறிந்த கை.களத்தூர் போலீசார் மற்றும் கல்வித்துறை அதிகாரிகள் சம்பவ இடத்திற்கு விரைந்து வந்து மறியலில் ஈடுபட்ட மாணவ- மாணவிகளுடன் பேச்சுவார்த்தை நடத்தினர். விரைவில் அரசிடம் இருந்து மடிக்கணினி வந்தவுடன் வழங்கப்படும் என உறுதி அளித்தனர். இதனைத்தொடர்ந்து மாணவ- மாணவிகள் சாலை மறியலை கைவிட்டு கலைந்து சென்றனர். இதனால் பெரம்பலூர்- சின்னசேலம் சாலையில் 1 மணி நேரம் போக்குவரத்து பாதிக்கப்பட்டது.